اسلام آباد میں جاری تین بڑے عوامی ترقیاتی منصوبے تکمیل کے آخری مرحلے میں داخل ہوگئے ہیں۔ وزیر داخلہ محسن نقوی نے ٹی چوک فلائی اوور، شاہین چوک انڈر پاس اور فیض آباد انٹرچینج کے پراجیکٹس کا دورہ کیا اور تعمیراتی سرگرمیوں کا تفصیلی جائزہ لیا۔
وزیر داخلہ نے تینوں منصوبوں پر پیشرفت کو اطمینان بخش قرار دیتے ہوئے ہدایت کی کہ کام کی رفتار مزید تیز کی جائے تاکہ شہریوں کو جلد سہولت میسر آسکے۔ انہوں نے منصوبوں کی خوبصورتی بڑھانے کے لیے لینڈ اسکیپنگ اور لائٹس نصب کرنے کی بھی ہدایت دی۔
فیض آباد انٹرچینج پر ٹریفک کی روانی مزید بہتر بنانے کے لیے لوپ ون اور لوپ ٹو کو تین لین تک توسیع دینے کا فیصلہ کیا گیا ہے، جبکہ ٹی چوک فلائی اوور اور شاہین چوک انڈر پاس پر تعمیراتی رفتار میں نمایاں تیزی آئی ہے۔
چیئرمین سی ڈی اے نے وزیر داخلہ کو بریفنگ دیتے ہوئے بتایا کہ ٹی چوک فلائی اوور کا 80 فیصد کام مکمل ہوچکا ہے اور اسے دسمبر کے اوائل میں کھول دیا جائے گا۔ شاہین چوک انڈر پاس کے 70 گرڈرز کی لانچنگ مکمل ہوچکی ہے، جبکہ ریمپ ون اور ریمپ ٹو کا کام سو فیصد مکمل کر لیا گیا ہے۔
محسن نقوی نے کہا کہ منصوبوں کی بروقت تکمیل سے نہ صرف ٹریفک دباؤ میں نمایاں کمی آئے گی بلکہ اسلام آباد، راولپنڈی اور پنجاب سے آنے والے مسافروں کو بھی بڑی سہولت ملے گی۔
دورے کے دوران ممبران سی ڈی اے، ڈپٹی کمشنر، ایڈیشنل ڈپٹی کمشنر اور دیگر متعلقہ حکام بھی موجود تھے۔
