اسلام آباد: وزیر خارجہ اسحاق ڈار نے کہا ہے کہ دنیا بھر میں جاری سلگتے تنازعات عالمی امن کے لیے سنگین خطرہ ہیں اور مئی میں ہونے والی پاک بھارت کشیدگی بھی خطرناک ثابت ہو سکتی تھی۔
ایک تقریب سے خطاب کرتے ہوئے انہوں نے کہا کہ موسمیاتی تبدیلی ایک بڑا چیلنج ہے، جبکہ جنوبی ایشیا کو غربت، ناخواندگی اور ناگہانی آفات جیسے مسائل درپیش ہیں۔ انہوں نے کہا کہ خطے کے ممالک کو اپنے مسائل کے حل کے بارے میں سنجیدگی سے سوچنا ہوگا۔
اسحاق ڈار نے مزید کہا کہ اسرائیل نے غزہ میں انسانیت کے خلاف مظالم کیے، دیرینہ مسئلہ کشمیر کے حل نہ ہونے سے خطے میں امن کو خطرہ لاحق ہے، اور جنوبی ایشیا دنیا کا سب سے زیادہ آبادی والا خطہ ہونے کے ناطے اس کے چیلنجز اور بھی سنگین ہیں۔
انہوں نے عالمی معاشی منظرنامے میں تبدیلیوں کی نشاندہی کرتے ہوئے کہا کہ موسمیاتی تبدیلی اور غذائی قلت کے چیلنجز جنوبی ایشیا میں سنگین ہوتے جا رہے ہیں، درجہ حرارت میں اضافہ اور سیلاب معیشت پر تباہ کن اثرات مرتب کر رہے ہیں۔
وزیر خارجہ نے کہا کہ جنوبی ایشیا میں سکیورٹی صورتحال بھی پیچیدہ ہے، بھارت نے یکطرفہ طور پر سندھ طاس معاہدہ معطل کرنے کا اعلان کیا، اور مئی میں پاک بھارت جنگ خطرناک ثابت ہو سکتی تھی۔ پاکستان ہمیشہ تنازعات کے حل کے لیے مذاکرات اور سفارتکاری کی حمایت کرتا ہے۔
