ایران اور امریکا کے درمیان جاری کشیدگی کے اثرات پاکستان کے گیس سیکٹر پر بھی ظاہر ہونا شروع ہو گئے ہیں، جس کے بعد سوئی ناردرن کے نظام پر دباؤ بڑھ گیا ہے اور پنجاب بھر میں گیس کی غیر اعلانیہ لوڈ مینجمنٹ شروع کر دی گئی ہے۔
ذرائع کے مطابق لاہور سمیت پنجاب کے مختلف شہروں میں صارفین کو گیس کی کمی کا سامنا ہے جس کے باعث کئی علاقوں میں گھریلو چولہے بند ہونے کی شکایات موصول ہو رہی ہیں۔
سوئی ناردرن حکام کا کہنا ہے کہ تاحال باضابطہ لوڈشیڈنگ شیڈول جاری نہیں کیا گیا، تاہم رمضان کے پیش نظر سحری اور افطاری کے اوقات میں گیس کی فراہمی کو ترجیح دی جا رہی ہے جبکہ باقی اوقات میں گیس کا پریشر کم رکھا جا رہا ہے۔
ایران اور امارات کے درمیان بیک چینل ڈپلومیسی سے خصوصی پروازیں ممکن
حکام کے مطابق کم پریشر کے باعث خاص طور پر گنجان آبادی والے علاقوں میں گیس کی فراہمی متاثر ہو سکتی ہے۔ انہوں نے بتایا کہ آر ایل این جی کی سپلائی 800 ملین کیوبک فٹ سے کم ہو کر 200 ملین کیوبک فٹ رہ گئی ہے جس سے نظام پر مزید دباؤ بڑھ گیا ہے۔
سوئی ناردرن حکام کا کہنا ہے کہ موجودہ صورتحال کا جائزہ لیا جا رہا ہے اور عید کے بعد حالات دیکھ کر آئندہ حکمت عملی طے کی جائے گی۔
