آزاد جموں و کشمیر کے انٹرمیڈیٹ بورڈ میرپور نے سال 2025 کے سالانہ امتحانات کے نتائج کا اعلان کر دیا ہے، جس میں طالبات نے ایک بار پھر مردوں پر واضح برتری حاصل کی ہے۔
ترجمان تعلیمی بورڈ کے مطابق اسرا عمر نے 1200 میں سے 1161 نمبر لے کر پہلی پوزیشن حاصل کی، جبکہ حنا بابر نے 1159 نمبر لے کر دوسری اور اقرا اظہر نے 1158 نمبر لے کر تیسری پوزیشن حاصل کی۔ تینوں طالبات نے اپنے شعبے میں اعلیٰ کارکردگی کا مظاہرہ کیا اور تعلیمی میدان میں اپنی قابلیت کا لوہا منوایا۔
اس کے علاوہ، بی آئی ایس ای سوات بورڈ نے بھی گیارہویں جماعت (ایچ ایس ایس سی پارٹ ون) کے سالانہ امتحانات کے نتائج کا اعلان کیا ہے، جن میں سوات اور شانگلہ کے طلبہ شامل ہیں۔ سوات بورڈ نے بھی اس سال عمدہ کارکردگی دکھائی ہے اور طلبہ و طالبات نے اچھے نمبروں سے تعلیمی میدان میں اپنی صلاحیتوں کا اظہار کیا ہے۔
نتائج کے اعلان کے موقع پر تعلیمی بورڈ کے حکام نے طلبہ و طالبات کو مبارکباد دی اور کہا کہ تعلیم پر توجہ دینا قوم کی ترقی کے لیے ناگزیر ہے۔ انہوں نے کہا کہ طالبات کی بڑھتی ہوئی کارکردگی نہ صرف خواتین کی تعلیمی صورتحال کی بہتری کا ثبوت ہے بلکہ ملک کے تعلیمی معیار کو بھی بہتر بنانے میں مددگار ثابت ہو رہی ہے۔
ایف بی آئی ایس ای انٹرمیڈیٹ کے نتائج کا اعلان، پنجاب گروپ آف کالجز نے ایک بار پھر میدان مار لیا
اس سال کے نتائج میں مجموعی کامیابی کی شرح بھی متاثر کن رہی، جس نے تعلیمی اداروں کی کارکردگی میں مثبت رجحان کو ظاہر کیا ہے۔ اس موقع پر والدین اور اساتذہ نے بھی طلبہ کی محنت کو سراہا اور کہا کہ یہ کامیابیاں مستقبل میں نوجوانوں کے روشن مستقبل کی ضمانت ہیں۔
