لاہور ائیرپورٹ کے اچانک دورے کے دوران وفاقی وزیر داخلہ محسن نقوی نے واضح طور پر کہا کہ غیرقانونی امیگریشن ہرگز برداشت نہیں کی جائے گی اور ضروری دستاویزات کے بغیر کسی مسافر کو سفر کی اجازت نہیں دی جائے گی۔
وفاقی وزیر داخلہ محسن نقوی اور وزیر برائے اوورسیز پاکستانیز چوہدری سالک حسین نے دو گھنٹے تک ائیرپورٹ پر امیگریشن پراسیس کا جائزہ لیا۔ اس دوران محسن نقوی نے امیگریشن کاؤنٹرز پر رش بڑھنے پر ناراضگی کا اظہار کیا اور عملے کو پراسیس تیز کرنے کے احکامات دیے۔
دونوں وزراء نے بیرونِ ملک جانے والے مسافروں سے بات چیت کی اور ان کے سفری معاملات سے متعلق سوالات کیے۔ چوہدری سالک حسین نے پاسپورٹس پر لگے پروٹیکٹور اسٹیکرز بھی چیک کیے۔
معائنے کے دوران ایک نوجوان کو ڈرائیونگ لائسنس نہ ہونے پر بیرون ملک ملازمت کے لیے سفر سے روک دیا گیا، جس پر سالک حسین نے برہمی کا اظہار کرتے ہوئے فوری انکوائری کا حکم دیا۔ انہوں نے ہدایت کی کہ پروٹیکٹر کے تحت مسافروں کی ملازمت سے متعلق دستاویزات کی مکمل تصدیق کی جائے۔
رپورٹ کے مطابق ایف آئی اے اہلکار کی مبینہ ملی بھگت سے ایک اور مسافر کو امیگریشن کاؤنٹر پر روکا گیا۔ آف لوڈ کیے گئے مسافر کو نجی کمپنی کو ادا کی گئی رقم واپس دلوانے کی یقین دہانی بھی کروائی گئی۔
محسن نقوی نے دونوں نوجوانوں کو روکنے والے ایف آئی اے اہلکاروں کو بلایا، شاباش دی، اپنی جیب سے انعام دیا اور تعریفی سرٹیفکیٹ دینے کا اعلان بھی کیا۔
وزیر داخلہ نے سخت مؤقف اختیار کرتے ہوئے کہا کہ ضروری دستاویزات کے بغیر کوئی بھی مسافر سفر نہیں کر سکے گا۔ ملک کی بدنامی کا باعث بننے والوں کو ہرگز اجازت نہیں دی جائے گی جبکہ ایف آئی اے یا کسی بھی ادارے کے ملوث اہلکار کے خلاف سخت کارروائی کی جائے گی۔
