اسلام آباد: صدر مملکت آصف علی زرداری نے کہا ہے کہ بھارت کی حالیہ جارحانہ اور غیر ذمہ دارانہ پالیسیوں سے جنوبی ایشیا میں امن و استحکام کو شدید خطرات لاحق ہوگئے ہیں۔
ایوان صدر میں پاکستان میں تعینات چینی سفیر چیانگ زئے ڈونگ سے ملاقات کے دوران صدر زرداری نے پہلگام واقعے کے بعد کی صورتحال اور دو طرفہ اہم امور پر تبادلہ خیال کیا۔
صدر مملکت نے بھارتی حکومت کے اشتعال انگیز بیانات اور اقدامات پر گہری تشویش کا اظہار کرتے ہوئے کہا کہ ایسے رویے خطے میں کشیدگی کو ہوا دینے کا سبب بن رہے ہیں، جو کسی بھی طور پر امن کے مفاد میں نہیں۔
انہوں نے اس موقع پر چین کی حکومت اور عوام کی جانب سے پاکستان کی مستقل حمایت کو خراج تحسین پیش کیا اور کہا کہ پاکستان ہر مشکل گھڑی میں چین کے تعاون کو قدر کی نگاہ سے دیکھتا ہے۔
ملاقات کے دوران چینی سفیر چیانگ زئے ڈونگ نے پاک چین دوستی کو ’’آہنی برادری‘‘ قرار دیتے ہوئے کہا کہ دونوں ممالک نے ہمیشہ ایک دوسرے کا ساتھ نبھایا ہے، خصوصاً آزمائش کے لمحات میں۔
چینی سفیر نے صدر مملکت کا شکریہ ادا کرتے ہوئے یقین دہانی کرائی کہ چین، جنوبی ایشیا میں امن و استحکام کی مشترکہ خواہش کے حصول کے لیے پاکستان کی مکمل حمایت جاری رکھے گا۔
