پاکستان میں بابا گرو نانک کے جنم دن کی تقریبات کے لیے بھارت سے آنے والی یاتری سربجیت کور کے لاپتہ ہونے کی خبر اس وقت واضح ہوئی جب معلوم ہوا کہ انہوں نے اسلام قبول کر کے ایک پاکستانی شہری سے شادی کرلی ہے۔ اسلام قبول کرنے کے بعد ان کا نام نور رکھا گیا ہے۔
نکاح نامے کے مطابق 48 سالہ سربجیت کور نے 5 نومبر کو شیخوپورہ کے علاقے فاروق آباد کے رہائشی ناصر حسین سے نکاح کیا، جس میں 10 ہزار روپے حق مہر رکھا گیا جو ادا بھی کر دیا گیا ہے۔ سربجیت کور 4 نومبر کو بھارتی یاتریوں کے ساتھ پاکستان آئی تھیں۔
13 نومبر کو بھارتی یاتری واپس روانہ ہوئے تو سربجیت کور ان کے ساتھ واپس نہ گئیں اور اسی روز ان کا ویزہ بھی ختم ہوگیا تھا، جس کے بعد انہیں لاپتہ قرار دے کر تلاش شروع کی گئی۔ بعد میں یہ بات سامنے آئی کہ وہ اپنی مرضی سے اسلام قبول کرنے اور شادی کے بعد پاکستان میں موجود ہیں۔
