فیلڈ مارشل عاصم منیر کا نیشنل ڈیفنس یونیورسٹی اسلام آباد میں خطاب، کہا بھارت آپریشن سندور میں ناکام رہا، پاکستان پر بیرونی مدد کا الزام بے بنیاد اور سیاسی ہے۔
اسلام آباد: فیلڈ مارشل سید عاصم منیر نے نیشنل ڈیفنس یونیورسٹی (NDU) اسلام آباد کا دورہ کیا، جہاں انہوں نے مسلح افواج کے افسران سے خطاب کرتے ہوئے "جنگ کے بدلتے ہوئے کردار” پر تفصیلی روشنی ڈالی۔ اپنے جامع خطاب میں انہوں نے بھارت کے حالیہ فوجی آپریشن "سندور” کی ناکامی پر کھل کر بات کرتے ہوئے کہا کہ بھارت اس آپریشن کے ذریعے اپنے فوجی مقاصد حاصل کرنے میں مکمل طور پر ناکام رہا۔
فیلڈ مارشل نے واضح کیا کہ بھارت کی جانب سے پاکستان پر کسی بیرونی طاقت کی حمایت کا الزام نہ صرف بے بنیاد ہے بلکہ ایک سیاسی حربہ بھی ہے۔ ان کے مطابق یہ الزام پاکستان کی دفاعی صلاحیتوں کو کم تر ثابت کرنے کی ایک کوشش ہے، جو بھارت کی اس روایتی سوچ کی عکاسی کرتا ہے جو پاکستان کی حقیقی کامیابیوں کو تسلیم کرنے سے انکاری ہے۔
انہوں نے کہا کہ بھارت نے اس فوجی تصادم کو دوطرفہ رکھنے کے بجائے بین الاقوامی رنگ دینے کی کوشش کی، جو درحقیقت اس کی سیاسی ناکامی اور غلط حکمت عملی کا نتیجہ ہے۔ فیلڈ مارشل کے مطابق پاکستان کی دفاعی کامیابیاں کسی بیرونی مدد کا نتیجہ نہیں بلکہ مکمل طور پر اس کی خودمختار حکمت عملی، پیشہ ورانہ مہارت اور عوام کے غیر متزلزل اعتماد کی بنیاد پر حاصل ہوئی ہیں۔
یہ بھی پڑھیں: آپریشن سندور: بھارت نے چھپائی گئی ہلاکتوں پر 100 فوجیوں کو اعزازات دے دیے
نیشنل ڈیفنس یونیورسٹی میں جاری سیکیورٹی اینڈ وار کورس میں شریک افسران نے فیلڈ مارشل کے خطاب کو سراہا اور ملکی دفاع کے لیے ان کے واضح وژن پر بھرپور اعتماد کا اظہار کیا۔
یاد رہے کہ "آپریشن سندور” بھارت کی جانب سے حالیہ مہینوں میں شروع کیا گیا ایک محدود فوجی اقدام تھا، جسے کئی بین الاقوامی دفاعی تجزیہ کاروں نے ناکام قرار دیا ہے۔ اب پاکستان کی اعلیٰ عسکری قیادت بھی اس پر کھل کر مؤقف دینے لگی ہے۔
