راولپنڈی، پاک فوج کے ترجمان لیفٹیننٹ جنرل احمد شریف چوہدری نے بھارتی جارحیت پر ردعمل دیتے ہوئے کہا ہے کہ بھارت نے رات کی تاریکی میں بزدلانہ انداز میں پاکستان کی مساجد اور شہری آبادی کو نشانہ بنایا، جس کے نتیجے میں2معصوم بچوں سمیت 26 بے گناہ شہری شہید اور 46 زخمی ہو گئے۔
ترجمان پاک فوج نے بریفنگ میں بتایا کہ بھارتی حملوں میں نشانہ بننے والے مقامات میں احمد پور شرقیہ شامل ہے جہاں 13 افراد شہید ہوئے، جبکہ مریدکے میں مسجد پر حملے کے نتیجے میں3 افراد جام شہادت نوش کر گئے۔
لیفٹیننٹ جنرل احمد شریف نے کہا کہ بھارت کا عبادت گاہوں پر حملہ اس انتہاپسند سوچ کا مظہر ہے جو مودی حکومت کے دور میں ہندوتوا نظریے کے تحت پروان چڑھ رہی ہے، جس میں اقلیتوں، بالخصوص مسلمانوں کی مذہبی آزادی کو دبایا جا رہا ہے۔
ڈی جی آئی ایس پی آر نے بتایا کہ پاکستان کی مسلح افواج نے بھارتی حملے کا مؤثر جواب دیتے ہوئے دشمن کے پانچ جنگی طیارے اور ایک کمبیٹ ڈرون مار گرائے، یہ کارروائی جنرل ایریا بھٹنڈہ، اکھنور، اونتی پور اور مقبوضہ سری نگر کے قریب انجام دی گئی، تباہ ہونے والے طیاروں میں تین رافیل، ایک مگ 29، ایک سکھوئی اور ایک ہیرون کمبیٹ ڈرون شامل ہیں۔
انہوں نے بتایا کہ پاک فوج نے بھارتی فوج کی لائن آف کنٹرول پر بلااشتعال فائرنگ کا بھرپور جواب دیتے ہوئے دشمن کی کئی چیک پوسٹیں، بشمول بریگیڈ ہیڈ کوارٹر، تباہ کر دیں، نشانہ بننے والی پوسٹوں میں چھتری، جورا اور شاہپور تھری شامل ہیں۔
لیفٹیننٹ جنرل احمد شریف نے بھارت کی جانب سے نیلم جہلم ہائیڈرو پاور پراجیکٹ کے نوسیری ڈیم کو نشانہ بنانے کی بھی شدید مذمت کی، پانی کے ذخائر کو نشانہ بنانا نہ صرف بین الاقوامی قوانین کی کھلی خلاف ورزی ہے بلکہ ایک خطرناک اقدام ہے، جس کے سنگین نتائج ہو سکتے ہیں۔
انہوں نے کہا کہ بھارتی حملے کے وقت 57 بین الاقوامی پروازیں پاکستانی فضائی حدود میں موجود تھیں اور بھارت نے ان ہزاروں بے گناہ مسافروں کی جانوں کو خطرے میں ڈال کر انتہائی غیر ذمہ دارانہ رویہ اختیار کیا۔
ترجمان پاک فوج نے واضح کیا کہ پاکستان اپنی خودمختاری اور شہریوں کے تحفظ کے لیے کسی بھی جارحیت کا منہ توڑ جواب دیتا رہا ہے اور آئندہ بھی دیتا رہے گا۔
