محکمہ سیاحت پنجاب نے اپنے فیلڈ دفاتر کو ضلعی انتظامیہ اور ایمرجنسی آپریشن سینٹرز سے مسلسل رابطے میں رہنے کی ہدایت کر دی ہے۔ ایڈوائزری کے مطابق تمام سیاحتی و تاریخی مقامات پر ایمرجنسی کنٹرول روم قائم کیے جائیں گے جبکہ ریسکیو اور ضلعی انتظامیہ سے فوری رابطے کے لیے فوکل پرسن بھی تعینات ہوں گے۔
محکمہ سیاحت نے عملے کو ریسکیو آپریشن اور ابتدائی طبی امداد کے لیے الرٹ رہنے کی تاکید کرتے ہوئے کہا ہے کہ تمام سیاحتی مقامات پر ایمرجنسی نمبرز آویزاں کیے جائیں۔
ایڈوائزری میں واضح کیا گیا ہے کہ دریاؤں، ندی نالوں اور ممکنہ خطرے والے علاقوں میں داخلہ محدود ہو گا۔ سیاحوں کو ہدایت کی گئی ہے کہ وہ سفر سے پہلے محکمہ موسمیات کی تازہ ترین اپ ڈیٹس سے ضرور باخبر رہیں۔
محکمہ سیاحت پنجاب نے عوام اور سیاحوں سے اپیل کی ہے کہ شدید بارش یا سیلابی صورتحال میں غیر ضروری سفر سے گریز کریں اور کسی بھی ہنگامی صورت حال میں فوری طور پر ایمرجنسی نمبروں پر رابطہ کریں۔
