انسداد دہشت گردی عدالت لاہور نے بانی پی ٹی آئی عمران خان کی بہن علیمہ خان کے بیٹے شیر شاہ خان کو جناح ہاؤس حملہ کیس میں 5 روزہ جسمانی ریمانڈ پر پولیس کے حوالے کر دیا۔
لاہور، بانی پاکستان تحریک انصاف (پی ٹی آئی) عمران خان کی بہن علیمہ خان کے دوسرے بیٹے شیر شاہ خان کو انسداد دہشت گردی عدالت نے 5 روزہ جسمانی ریمانڈ پر پولیس کے حوالے کر دیا۔
لاہور کی انسداد دہشت گردی عدالت میں کیس کی سماعت جج منظر علی گل نے کی۔ سماعت کے آغاز پر عدالت نے میڈیا نمائندگان کو کمرہ عدالت سے باہر نکالنے کا حکم دیا اور ہدایت کی کہ آئندہ میڈیا نمائندگان کمرہ عدالت میں موبائل فون ساتھ نہ لائیں بلکہ صرف قلم اور کاغذ کے ساتھ آئیں۔
پراسیکیوشن نے مؤقف اپنایا کہ شیر شاہ خان جائے وقوعہ پر موجود تھا، جہاں اسلحہ استعمال ہوا، اور ویڈیو شواہد میں بھی اس کی موجودگی ثابت ہوتی ہے۔ مزید یہ کہ ملزم کے سوشل میڈیا اکاؤنٹس ریکور کرنے ہیں، اس لیے اسے 30 روزہ جسمانی ریمانڈ پر پولیس کے حوالے کیا جائے۔
ملزم کے وکیل سلمان اکرم راجہ نے اعتراض اٹھاتے ہوئے کہا کہ شیر شاہ کو 27 ماہ بعد گرفتار کیا گیا اور یہ گرفتاری غیر قانونی ہے۔ ان کے مطابق شیر شاہ گزشتہ روز اپنے بھائی کے ساتھ عدالت میں پیش ہوا تھا جہاں سے گرفتار کر لیا گیا۔
دونوں جانب کے دلائل سننے کے بعد عدالت نے فیصلہ محفوظ کیا اور بعد ازاں 5 روزہ جسمانی ریمانڈ منظور کر لیا۔ ملزم کو تھانہ سرور روڈ میں درج جناح ہاؤس حملہ کیس میں نامزد کیا گیا ہے۔
واضح رہے کہ گزشتہ روز علیمہ خان کے بڑے بیٹے شاہ ریز عظیم کو بھی اسی عدالت میں پیش کیا گیا تھا، جہاں ان کے 8 روزہ جسمانی ریمانڈ کی منظوری دی گئی تھی۔ دونوں گرفتاریاں 9 مئی کے پرتشدد واقعات کے سلسلے میں عمل میں لائی گئی ہیں۔
