پی ٹی آئی رہنما سلمان اکرم راجہ کا کہنا ہے کہ عمران خان کے بیٹے ضرور واپس آئیں گے، یہ اُن کا بنیادی حق ہے، ہمارا قافلہ لاہور صرف عوامی مسائل پر گفتگو کے لیے جا رہا ہے۔
اسلام آباد: پاکستان تحریک انصاف (پی ٹی آئی) کے رہنما اور معروف قانون دان سلمان اکرم راجہ نے کہا ہے کہ عمران خان کے بیٹوں کا پاکستان واپس آنا اُن کا بنیادی اور قانونی حق ہے، اور وہ ضرور واپس آئیں گے۔ ان خیالات کا اظہار انہوں نے کے پی ہاؤس کے باہر میڈیا سے گفتگو کرتے ہوئے کیا۔
تفصیلات کے مطابق، اسلام آباد میں پی ٹی آئی کے ارکانِ قومی و صوبائی اسمبلی کے اعزاز میں ایک ظہرانے کا اہتمام کیا گیا، جس میں اپوزیشن لیڈر عمر ایوب، علی امین گنڈاپور اور دیگر پارٹی رہنماؤں نے شرکت کی۔ اس موقع پر مستقبل کی سیاسی حکمت عملی، سینیٹ انتخابات اور عوامی رابطہ مہم پر تبادلہ خیال کیا گیا۔
سلمان اکرم راجہ نے مزید کہا کہ لاہور جا کر پارٹی قیادت سے ملک کی موجودہ معاشی و سیاسی صورتحال پر بات چیت کی جائے گی، قافلہ عوامی مسائل پر گفتگو کے لیے جا رہا ہے، کوئی تصادم یا انتشار کا ارادہ نہیں۔ انہوں نے آرٹیکل 19 کا حوالہ دیتے ہوئے کہا کہ اظہارِ رائے ہمارا بنیادی حق ہے، جو ہم سے چھینا جا رہا ہے۔
اسرائیل نے قاسم اور سلمان نامی میزائل لانچ کر دیے،عظمیٰ بخاری کا طنزیہ وار
دوسری طرف پی ٹی آئی چیئرمین بیرسٹر گوہر علی خان نے کہا کہ کوئی گرفتاری ممکن نہیں، تمام قیادت آئینی دائرہ کار میں کام کر رہی ہے، اور لاہور کے دورے کا مقصد سینیٹ انتخابات سے متعلق اہم ملاقاتیں ہیں۔ انہوں نے کہا کہ جمہوریت کو مضبوط کرنے کے لیے تمام سیاسی قوتوں کو ایک ہونا ہوگا۔
یاد رہے کہ چند روز قبل مسلم لیگ (ن) کے رہنماؤں نے عمران خان کے بیٹوں کی ممکنہ واپسی پر تحفظات کا اظہار کیا تھا، جس کے جواب میں پی ٹی آئی نے اسے آئینی و قانونی حق قرار دے کر واپس آنے کا اعلان کیا ہے۔
