پشاور میں میڈیا سے گفتگو کرتے ہوئے وزیرِ اعلیٰ خیبر پختونخوا علی امین گنڈا پور نے کہا کہ پاکستان تحریک انصاف کے بانی عمران خان اور اسٹیبلشمنٹ کے درمیان پیدا ہونے والے مسائل کو عمران خان خود ہی حل کریں گے، اور اس حوالے سے ان کے پاس کوئی اختیار نہیں ہے۔
علی امین گنڈا پور نے بتایا کہ عمران خان کی رہائی کے راستے میں دو بڑی رکاوٹیں موجود ہیں۔ پہلی رکاوٹ ملک میں آئین و قانون کی عمل داری کا نہ ہونا ہے۔ اگر قانون کو مؤثر طریقے سے نافذ کیا جائے تو خان صاحب فوری طور پر رہا ہو سکتے ہیں۔
دوسری بڑی رکاوٹ اسٹیبلشمنٹ کے ساتھ جاری مسئلہ ہے جسے عمران خان کو خود حل کرنا ہے، اور اس معاملے میں وزیر اعلیٰ کا کوئی اختیار نہیں ہے۔
انہوں نے مزید کہا کہ عمران خان قوم کی جنگ لڑ رہے ہیں اور موجودہ حالات سب کے سامنے ہیں۔ ہم اپنے نظریے کے ساتھ کھڑے ہیں اور جب تک اپنا مقصد حاصل نہیں کر لیتے، جدوجہد جاری رہے گی۔
