راولپنڈی: پاکستان تحریک انصاف (پی ٹی آئی) کے چیئرمین بیرسٹر گوہر علی خان نے انکشاف کیا ہے کہ پارٹی نے بانی پی ٹی آئی عمران خان کو باقاعدہ طور پر پیٹرن انچیف مقرر کر دیا ہے۔
اڈیالہ جیل میں صحافیوں سے غیر رسمی گفتگو کرتے ہوئے بیرسٹر گوہر نے ملک گیر احتجاج کی تیاریوں اور پارٹی حکمت عملی سے متعلق تفصیلات فراہم کیں۔ ان کا کہنا تھا کہ احتجاجی مہم کے دوران عمران خان کی نمائندگی عمر ایوب اور سلمان اکرم راجا کریں گے، جب کہ علی امین گنڈا پور کو خیبر پختونخوا میں گورننس کے معاملات کی نگرانی سونپی گئی ہے۔
ذرائع کے مطابق، تنظیمی فیصلوں میں عمران خان کی براہِ راست مداخلت جاری ہے، جیسا کہ حالیہ دنوں میں پارٹی کمیٹی پر اعتراض اور علیہ حمزہ کی تقرری کی مثال سامنے آئی۔ تفصیل یہاں دیکھیں۔
بیرسٹر گوہر نے مزید بتایا کہ احتجاجی سرگرمیوں کے ساتھ ساتھ انہیں بطور چیئرمین ڈپلومیٹک رابطوں کی ذمہ داری بھی دی گئی ہے۔ ان کا کہنا تھا:
"میں ہی پارٹی کا باقاعدہ چیئرمین ہوں، اور تمام عدالتی مقدمات میں تحریک انصاف کی نمائندگی کروں گا۔"
تحریک انصاف کی جانب سے یہ نیا تنظیمی ڈھانچہ ایسے وقت میں متعارف کرایا گیا ہے جب پارٹی سیاسی دباؤ اور قانونی چیلنجز کا سامنا کر رہی ہے۔
