عمران خان نے پنجاب میں بنائی گئی 4 رکنی سیاسی کمیٹی پر تحفظات کا اظہار کرتے ہوئے عالیہ حمزہ کو کمیٹی کی سربراہی سونپنے کی ہدایت جاری کر دی، نوٹیفکیشن دوبارہ جاری کرنے کا فیصلہ۔
راولپنڈی کی اڈیالہ جیل میں قید بانی پاکستان تحریک انصاف عمران خان نے پنجاب میں تشکیل دی گئی چار رکنی سیاسی کمیٹی پر اپنے تحفظات کا اظہار کیا ہے اور واضح ہدایت جاری کی ہے کہ اس کمیٹی کا نوٹیفکیشن فوری طور پر دوبارہ جاری کیا جائے۔ عمران خان نے یہ پیغام سینیٹر علی ظفر کے ذریعے پارٹی کی اعلیٰ قیادت تک پہنچایا۔
ابتدائی طور پر تشکیل دی گئی اس کمیٹی میں سلمان اکرم راجہ، عمر ایوب، احمد خان بچھر اور عثمان اکرم شامل تھے، تاہم عمران خان کو جب پارٹی رہنماؤں کی جانب سے آگاہ کیا گیا کہ اس کمیٹی کی تشکیل عالیہ حمزہ کو سربراہی سے محروم رکھ کر کی گئی ہے تو انہوں نے فوری طور پر ردعمل دیتے ہوئے اس پر شدید تحفظات ظاہر کیے۔
اس کے بعد عمران خان نے علی ظفر کو واضح ہدایت دی کہ عالیہ حمزہ کو پنجاب کی سیاسی کمیٹی کا سربراہ مقرر کیا جائے اور پارٹی رہنما شمیم نقوی کو اس فیصلے سے فوری آگاہ کیا جائے، اس حوالے سے اڈیالہ جیل میں عمران خان سے ملاقات کرنے والے سینیٹر علی ظفر، وکیل عالیہ حمزہ، علی عمران اور فیصل چودھری نے صحافیوں سے غیر رسمی گفتگو میں اس فیصلے کی تصدیق بھی کر دی ہے۔
یاد رہے کہ پاکستان تحریک انصاف کے اندرونی معاملات بالخصوص پنجاب میں پارٹی تنظیم سازی اور قیادت کے انتخاب کے حوالے سے پچھلے کچھ عرصے سے مختلف آراء سامنے آ رہی ہیں۔ عمران خان کی طرف سے براہ راست مداخلت اور ہدایات اس بات کی علامت ہیں کہ وہ پارٹی کے تنظیمی ڈھانچے کو خود اپنے کنٹرول میں رکھنا چاہتے ہیں، چاہے وہ جیل میں ہی کیوں نہ ہوں۔
پارٹی تنظیمِ نو کے ساتھ ساتھ عمران خان کی توجہ اس بات پر بھی ہے کہ تحریک انصاف میں خواتین کی فعال شرکت یقینی بنائی جائے۔ حالیہ دنوں میں مختلف شہروں میں خواتین رہنماؤں نے بھی سیاسی سرگرمیوں میں بھرپور کردار ادا کیا ہے، خاص طور پر ظلم کے نظام کے خلاف تحریک میں خواتین کی قیادت کا کردار ابھر کر سامنے آیا ہے، جس کی تفصیل اس رپورٹ میں ملاحظہ کی جا سکتی ہے۔
