اسلام آباد، چیئرمین تحریک انصاف بیرسٹر گوہر کا کہنا ہے کہ اگر بیرونی مخالفین سے صلح ممکن ہے تو اپنوں کے ساتھ مفاہمت کیوں نہیں ہوسکتی؟
میڈیا سے بات کرتے ہوئے بیرسٹر گوہر نے کہا کہ اگر والدین کو قید رکھا جائے تو اولاد کب تک ساتھ دے گی؟ کب تک خوشی کی تقریبات میں شریک ہوگی اور آخر کیوں شریک ہو؟
ان کا کہنا تھا کہ اس وقت قوم ایک مؤقف پر متحد ہے اور اس اتحاد کو استعمال کرتے ہوئے بانی پی ٹی آئی کی رہائی عمل میں آنی چاہیے۔
بیرسٹر گوہر نے مزید کہا کہ پارٹی رہنماؤں کو بانی پی ٹی آئی اور ان کی اہلیہ بشریٰ بی بی سے ملاقات کی اجازت دی جائے، اب سیاسی درجہ حرارت میں کمی کی ضرورت ہے۔
دوسری جانب پاک فوج نے 22 اپریل سے 10 مئی تک کی جنگی صورتحال کو "معرکۂ حق” قرار دیتے ہوئے اسے ایک تاریخی باب قرار دیا۔
آئی ایس پی آر کے مطابق، بھارتی جارحیت اور آپریشن بنیان مرصوص کے دوران پاکستانی میڈیا نے دشمن کے پروپیگنڈے کے خلاف ڈٹ کر کردار ادا کیا، ترجمان پاک فوج نے کہا کہ الحمدللہ، مسلح افواج نے قوم سے کیا وعدہ نبھایا اور عوام نے بھرپور حمایت فراہم کی۔
