سندھ کے ضلع حیدر آباد میں پولیو وائرس کے ایک نئے کیس کی تصدیق ہو گئی ہے، جس کے بعد رواں سال پاکستان بھر میں پولیو کیسز کی مجموعی تعداد 27 تک جا پہنچی ہے۔ نیشنل ایمرجنسی آپریشن سینٹر (ای او سی) کے مطابق 2025 کے دوران صرف سندھ میں اب تک پولیو کے 7 کیسز سامنے آ چکے ہیں۔
ای او سی کا کہنا ہے کہ پولیو ایک لاعلاج مرض ہے جو متاثرہ بچوں کو عمر بھر کے لیے معذوری میں مبتلا کر سکتا ہے۔ اس خطرناک بیماری سے بچاؤ کا واحد مؤثر ذریعہ حفاظتی ویکسین ہے، جسے ہر انسداد پولیو مہم میں پلوانا انتہائی ضروری ہے۔
نیشنل ایمرجنسی آپریشن سینٹر نے والدین سے پرزور اپیل کی ہے کہ وہ آنے والی ہر پولیو مہم میں اپنے بچوں کو قطرے ضرور پلوائیں تاکہ اس موذی مرض کا جڑ سے خاتمہ ممکن ہو سکے۔
واضح رہے کہ ملک گیر انسداد پولیو مہم کا آئندہ مرحلہ 13 اکتوبر سے 19 اکتوبر 2025 تک جاری رہے گا، جس میں لاکھوں بچوں کو حفاظتی قطرے پلانے کا ہدف مقرر کیا گیا ہے۔
