مظفرآباد، آزاد جموں و کشمیر کے ضلع حویلی کے علاقے بھیڑی اور گرد و نواح میں منہ کھر کی بیماری نے شدت اختیار کر لی، سیکڑوں مویشی اور گھوڑے متاثر جبکہ درجنوں جانور ہلاک ہو گئے ہیں۔ محکمہ امور حیوانات اطلاع کے باوجود ویکسین اور علاج فراہم کرنے میں ناکام رہا۔
مقامی افراد کے مطابق بیماری پھیلنے کے باوجود محکمہ امور حیوانات کا عملہ علاقے میں موجود نہیں، جس کے باعث مویشی مالکان اپنے بیمار جانوروں کو مقامی پیر کے پاس دم کرانے پر مجبور ہیں۔ چراگاہوں میں بیمار مویشیوں کو جمع کر کے دم کرایا جا رہا ہے۔
اہل علاقہ کا کہنا ہے کہ کئی ہفتوں سے درجنوں جانور منہ کھر کے باعث مر چکے ہیں لیکن محکمہ امور حیوانات کی جانب سے نہ تو ویکسین فراہم کی گئی اور نہ ہی ڈاکٹر بھیجے گئے۔
مویشی پال حضرات کا کہنا ہے کہ جولائی اور اگست کے مہینوں میں منہ کھر کی وبا تیزی سے پھیلتی ہے جس سے نہ صرف جانور ہلاک ہوتے ہیں بلکہ دودھ کی پیداوار میں بھی نمایاں کمی واقع ہوتی ہے۔
دوسری جانب محکمہ امور حیوانات آزاد جموں و کشمیر کے اہلکاروں سے مؤقف لینے کی کوشش کی گئی تو انہوں نے اتوار کی چھٹی کا بہانہ بنا کر جواب دینے سے انکار کر دیا، جبکہ ڈائریکٹر جنرل امور حیوانات ڈاکٹر اعجاز خان کا موبائل نمبر مسلسل بند مل رہا ہے۔
