کراچی: وزیراعلیٰ سندھ سید مراد علی شاہ نے سانحہ گل پلازہ میں جاں بحق ہونے والے افراد کے لواحقین کو فی کس ایک کروڑ روپے مالی امداد دینے کا اعلان کرتے ہوئے کہا ہے کہ صوبائی حکومت تمام متاثرین کی مکمل بحالی کو یقینی بنائے گی۔
ترجمان کے مطابق وزیراعلیٰ سندھ کی زیر صدارت ایک اہم اجلاس منعقد ہوا جس میں صوبائی وزراء شرجیل انعام میمن، ناصر حسین شاہ، سعید غنی، میئر کراچی اور دیگر متعلقہ حکام نے شرکت کی۔ اجلاس میں سانحہ گل پلازہ کی صورتحال، نقصانات اور متاثرین کی بحالی سے متعلق امور پر تفصیلی غور کیا گیا۔
وزیراعلیٰ مراد علی شاہ نے کہا کہ جاں بحق افراد کے ورثا کو مالی امداد کی فراہمی کا عمل کل سے شروع کر دیا جائے گا۔ انہوں نے کہا کہ گل پلازہ میں آگ لگنے کا واقعہ نہایت افسوسناک ہے جس کے نتیجے میں قیمتی انسانی جانیں ضائع ہوئیں اور کئی خاندان شدید متاثر ہوئے۔
مراد علی شاہ کا کہنا تھا کہ اس سانحے کے باعث سینکڑوں افراد کا روزگار متاثر ہوا ہے، حکومت کی اولین ترجیح ہے کہ تمام متاثرہ تاجروں اور کاروباری افراد کو جلد از جلد بحال کیا جائے۔ انہوں نے بتایا کہ صدر مملکت آصف علی زرداری اور چیئرمین پیپلز پارٹی بلاول بھٹو زرداری مسلسل رابطے میں ہیں اور متاثرین کی فوری بحالی کے خواہاں ہیں۔
سانحہ گل پلازہ میں ریسکیو کی ناکامی حکومتی نااہلی کا ثبوت ہے: صدر انجمن تاجران سندھ
وزیراعلیٰ سندھ نے مزید کہا کہ ابتدائی اطلاعات کے مطابق گل پلازہ میں تقریباً 1200 دکانیں موجود تھیں، جس کا مطلب ہے کہ اتنی ہی تعداد میں افراد متاثر ہوئے ہیں۔ انہوں نے حکام کو ہدایت دی کہ بحالی کے جامع منصوبے کو فوری حتمی شکل دی جائے۔
انہوں نے بتایا کہ گل پلازہ میں آگ لگنے کا واقعہ انتہائی سنگین نوعیت کا ہے، ریسکیو اور فائر بریگیڈ کا عملہ مختلف مقامات سے اندر داخل ہو کر امدادی کارروائیاں جاری رکھے ہوئے ہے، جبکہ 73 افراد تاحال لاپتہ ہیں جن کی تلاش جاری ہے۔
وزیراعلیٰ نے ملبہ فوری طور پر ہٹانے، آگ لگنے کی وجوہات جاننے کے لیے فرانزک رپورٹ تیار کرنے اور واقعے میں شہید ہونے والوں کے خاندانوں کو فوری معاوضہ فراہم کرنے کی بھی ہدایات جاری کیں۔ ترجمان کے مطابق گل پلازہ کے متاثرین کے لیے خصوصی کمیٹی بھی قائم کر دی گئی ہے۔
