61
گوجرانوالہ میں افسوسناک واقعہ، انٹرنیشنل پہلوان نوید کی دو کم سن بیٹیاں مضر صحت کھانا کھانے کے باعث جاں بحق ہو گئیں۔ اہلِ خانہ نے واقعے کو اتفاقی حادثہ قرار دے کر کسی کے خلاف قانونی کارروائی سے انکار کر دیا۔
تفصیلات کے مطابق پہلوان نوید نے اپنی 7 سالہ بیٹی نور فاطمہ کی سالگرہ کے موقع پر بچوں کے ہمراہ ایک نجی فوڈ پوائنٹ پر کھانا کھایا۔ کھانے کے کچھ ہی دیر بعد نوید اور ان کے چار بچوں کی طبیعت بگڑ گئی، جنہیں فوری طور پر سول اسپتال منتقل کیا گیا۔
اسپتال ذرائع کے مطابق دورانِ علاج نوید کی دو بیٹیاں، 7 سالہ نور فاطمہ اور 4 سالہ جنت دم توڑ گئیں۔ اہلِ خانہ کا کہنا ہے کہ یہ ایک افسوسناک مگر اتفاقی واقعہ ہے اور وہ کسی پر الزام عائد نہیں کرنا چاہتے۔
واقعے کے بعد شہریوں نے فوڈ پوائنٹس کے معیار پر سوال اٹھاتے ہوئے ضلعی انتظامیہ سے سخت کارروائی کا مطالبہ کیا ہے تاکہ آئندہ ایسے افسوسناک سانحات سے بچا جا سکے۔
