گوجرانوالہ میں چوری کی ایک غیر معمولی اور حیران کن واردات سامنے آئی ہے جہاں لاکھوں روپے مالیت کا چلغوزہ چوری کر لیا گیا۔ یہ واقعہ ماڈل ٹاؤن کے علاقے میں پیش آیا، جس نے شہریوں کے ساتھ ساتھ قانون نافذ کرنے والے اداروں کو بھی تشویش میں مبتلا کر دیا ہے۔ واقعے میں ساڑھے پانچ سو کلو گرام چلغوزہ چوری ہوا جس کی مالیت متاثرہ شخص کے مطابق 38 لاکھ 50 ہزار روپے بتائی جا رہی ہے۔
تفصیلات کے مطابق یہ واردات چند روز قبل دن دیہاڑے پیش آئی، جس کی سی سی ٹی وی فوٹیج اب منظر عام پر آ گئی ہے۔ فوٹیج میں واضح طور پر دیکھا جا سکتا ہے کہ تین ملزمان نہایت اطمینان کے ساتھ چھ بوریاں اٹھا کر لے جا رہے ہیں۔ حیران کن طور پر یہ ساری کارروائی دن کے وقت ہوئی اور اردگرد موجود لوگوں کو بھی بروقت خبر نہ ہو سکی۔
متاثرہ تاجر کے مطابق چلغوزہ اس کی دکان یا گودام میں موجود تھا، جسے ملزمان منصوبہ بندی کے تحت چوری کر کے فرار ہو گئے۔ اس کا کہنا ہے کہ چوری ہونے والا چلغوزہ اعلیٰ کوالٹی کا تھا اور مارکیٹ میں اس کی مجموعی قیمت ساڑھے 38 لاکھ روپے بنتی ہے، تاہم پولیس کی جانب سے درج مقدمے میں نقصان کی مالیت ساڑھے تین لاکھ روپے ظاہر کی گئی ہے، جس پر متاثرہ فریق نے تحفظات کا اظہار کیا ہے۔
چلغوزہ سستا، جنوبی وزیرستان میں فی کلو 3 ہزار روپے میں دستیاب
دوسری جانب ماڈل ٹاؤن پولیس کا کہنا ہے کہ واقعے کا مقدمہ درج کر لیا گیا ہے اور سی سی ٹی وی فوٹیج کی مدد سے ملزمان کی شناخت کی جا رہی ہے۔ پولیس حکام کے مطابق ملزمان کو جلد گرفتار کر کے قانون کے کٹہرے میں لایا جائے گا۔
شہریوں نے اس واقعے پر تشویش کا اظہار کرتے ہوئے مطالبہ کیا ہے کہ بڑھتی ہوئی چوری کی وارداتوں پر قابو پانے کے لیے مؤثر اقدامات کیے جائیں، تاکہ کاروباری طبقہ خود کو محفوظ محسوس کر سکے۔
