11
لاہور ، گورنر پنجاب سردار سلیم حیدر خان نے عیدالاضحیٰ کے دوسرے روز سنتِ ابراہیمی ادا کرتے ہوئے خود قصائی کے ہمراہ گائے کی قربانی کی، اس موقع پر انہوں نے ملک بھر کے مسلمانوں کو عید کی خوشیوں کی مبارکباد دیتے ہوئے کہا کہ یہ دن قربانی ، ایثار اور بھائی چارے کا پیغام لیے ہوئے ہے۔
گورنر پنجاب نے کہا کہ عید جیسے بابرکت موقع پر معاشرے کے مستحق اور سفید پوش افراد کا خاص خیال رکھا جائے، کیونکہ حقیقی خوشی تب ہی ممکن ہے جب ہم دوسروں کو بھی اس میں شریک کریں۔
انہوں نے کہا کہ سنتِ ابراہیمی ادا کرنے کے ساتھ ساتھ ہمیں اپنے دلوں سے نفرتیں مٹا کر اللہ تعالیٰ کے احکامات کے تابع ہو جانا چاہیے۔
سیاسی امور پر بات کرتے ہوئے سردار سلیم حیدر خان نے چیئرمین پیپلز پارٹی بلاول بھٹو زرداری کی خارجہ پالیسی میں کاوشوں کو سراہا۔
انہوں نے کہا کہ بلاول بھٹو نے سفارتی محاذ پر پاکستان کی شاندار نمائندگی کی ہے اور وہ دن دور نہیں جب وہ ملک کے وزیراعظم بن کر قوم کی خدمت کریں گے۔
یاد رہے کہ سردار سلیم حیدر خان حال ہی میں گورنر پنجاب تعینات ہوئے ہیں اور عید کے موقع پر ان کی یہ عوامی سرگرمی سادگی اور قومی یکجہتی کے پیغام کے طور پر دیکھی جا رہی ہے۔
