حکومت نے پیٹرولیم مصنوعات کی قیمتوں میں کمی کر دی

اسلام آباد: حکومت نے پیٹرولیم مصنوعات کی قیمتوں میں کمی کا اعلان کر دیا ہے، جس کا باضابطہ نوٹیفکیشن پیٹرولیم ڈویژن نے جاری کر دیا۔

پیٹرولیم ڈویژن کے مطابق حکومت نے آئل اینڈ گیس ریگیولیٹری اتھارٹی (اوگرا) کی سفارشات کی روشنی میں پیٹرولیم مصنوعات کی قیمتوں میں رد و بدل کیا ہے۔ نئی قیمتوں کا اطلاق یکم دسمبر 2025 سے اگلے 15 روز کے لیے ہوگا۔

نوٹیفکیشن کے مطابق پیٹرول کی فی لیٹر قیمت میں 2 روپے کمی کی گئی ہے، جس سے قیمت 265 روپے 45 پیسے سے کم ہو کر 263 روپے 45 پیسے ہو گئی ہے۔

اسی طرح ہائی اسپیڈ ڈیزل کی فی لیٹر قیمت میں 4 روپے 79 پیسے کمی کی گئی ہے۔ ڈیزل کی نئی قیمت 279 روپے 65 پیسے فی لیٹر مقرر کی گئی ہے جبکہ سابقہ قیمت 284 روپے 44 پیسے فی لیٹر تھی۔