اسلام آباد: بجلی کے بلوں کی مد میں وفاقی، صوبائی اور دیگر سرکاری اداروں کے ذمہ واجب الادا رقم پونے 3 کھرب روپے تک پہنچ گئی ہے۔
وزارت پاور ڈویژن کی جانب سے پارلیمنٹ کو فراہم کردہ تفصیلات کے مطابق وفاقی حکومت اور اس کے اداروں کے ذمہ ایک کھرب 26 ارب 31 کروڑ 30 لاکھ روپے ہیں، جبکہ صوبائی حکومتوں اور ان کے اداروں کے واجب الادا بل ایک کھرب 43 ارب 87 کروڑ 30 لاکھ روپے بنتے ہیں۔ اس طرح مجموعی طور پر یہ رقم 2 کھرب 70 ارب 18 کروڑ 60 لاکھ روپے تک پہنچ گئی ہے۔
31 اگست 2025 تک کی تفصیلات کے مطابق وفاقی حکومت اور اس کے اداروں کے ذمہ 36 ارب 40 کروڑ 40 لاکھ روپے، آزاد جموں و کشمیر کے ذمہ 63 ارب 59 کروڑ 70 لاکھ روپے، اٹانومس باڈیز کے ذمہ 19 ارب 96 کروڑ 40 لاکھ روپے، اور لوکل باڈیز کے ذمہ 6 ارب 34 کروڑ 10 لاکھ روپے واجب الادا ہیں۔
مزید تفصیلات کے مطابق صوبائی حکومت اور اس کے ڈپارٹمنٹس کے ذمہ 68 ارب 32 کروڑ روپے، اٹانومس باڈیز کے ذمہ 20 ارب 64 کروڑ 70 لاکھ روپے، لوکل باڈیز کے ذمہ 7 ارب 30 کروڑ 80 لاکھ روپے، سٹی ڈسٹرکٹ گورنمنٹ کے ذمہ 12 ارب 30 کروڑ 60 لاکھ روپے اور ٹی ایم اے کے ذمہ 12 ارب 29 کروڑ 20 لاکھ روپے بجلی کے واجب الادا بل موجود ہیں۔
