کراچی: حکومت نے امن و امان کی صورتحال اور شہری سہولت کو مدنظر رکھتے ہوئے 26 اپریل 2025 (ہفتہ) کو کراچی بھر میں عام تعطیل کا اعلان کر دیا ہے۔
کمشنر کراچی کی جانب سے جاری نوٹیفکیشن کے مطابق اس روز شہر کے تمام سرکاری و نجی دفاتر، تعلیمی ادارے، اور کاروباری مراکز بند رہیں گے۔ تاہم اسپتال، ایمرجنسی سروسز اور ریسکیو ادارے اپنی معمول کی خدمات جاری رکھیں گے۔
نوٹیفکیشن میں شہریوں سے اپیل کی گئی ہے کہ وہ 26 اپریل کو غیر ضروری سفر سے اجتناب کریں اور کسی بھی ممکنہ ہنگامی صورتِ حال میں انتظامیہ سے تعاون کریں۔
تعطیل کا فیصلہ شہر میں طے شدہ ہڑتال کے تناظر میں کیا گیا ہے۔ ہڑتال کے پسِ منظر میں فلسطینی عوام سے اظہار یکجہتی، سندھ کے آبی وسائل کے تحفظ اور بلوچ عوام کے حقوق کے لیے احتجاج شامل ہیں۔
واضح رہے کہ جماعت اسلامی نے 22 اپریل کو غزہ میں جاری اسرائیلی مظالم کے خلاف ملک گیر ہڑتال کا اعلان کیا تھا، جسے کراچی کی تمام بڑی تاجر تنظیموں کی حمایت بھی حاصل ہے۔ بعد ازاں 26 اپریل کو کراچی میں مکمل ہڑتال کا اعلان کیا گیا جس کے نتیجے میں کاروباری سرگرمیاں معطل رہیں گی۔
شہری حلقوں میں اس اعلان پر ملا جلا ردِعمل دیکھنے میں آیا ہے۔ کئی افراد نے اسے فلسطینیوں سے یکجہتی کا اہم قدم قرار دیا ہے، جبکہ بعض شہریوں نے روزمرہ زندگی متاثر ہونے پر تحفظات کا اظہار بھی کیا ہے۔
