عالمی اور مقامی گولڈ مارکیٹس میں ایک روز قبل نمایاں اضافے کے بعد سونے اور چاندی کی قیمتوں میں دوبارہ کمی ریکارڈ کی گئی ہے، جس سے خریداروں کو جزوی ریلیف ملا ہے۔ عالمی منڈی میں قیمتیں کم ہونے کے اثرات مقامی مارکیٹ پر بھی پڑے ہیں۔
آل پاکستان صرافہ ایسوسی ایشن کے مطابق مقامی مارکیٹ میں 24 کیرٹ فی تولہ سونے کی قیمت میں 2 ہزار روپے کی کمی ہوئی، جس کے بعد فی تولہ سونا 4 لاکھ 52 ہزار 262 روپے پر آ گیا۔ اسی طرح 10 گرام سونے کی قیمت 1 ہزار 715 روپے کم ہو کر 3 لاکھ 87 ہزار 741 روپے کی سطح پر پہنچ گئی۔
چاندی کی قیمتوں میں بھی کمی دیکھنے میں آئی ہے۔ صرافہ ایسوسی ایشن کے مطابق فی تولہ چاندی 220 روپے سستی ہو کر 6 ہزار 464 روپے میں فروخت ہونے لگی ہے، جس سے زیورات بنانے والوں اور خریداروں کو کچھ سہولت ملی ہے۔
سونا مزید سستا، فی تولہ قیمت 4 لاکھ 43 ہزار 162 روپے ہو گئی
دوسری جانب عالمی مارکیٹ میں بھی سونے کی قیمت میں کمی دیکھی گئی۔ عالمی منڈی میں فی اونس سونا 20 ڈالر سستا ہو کر 4 ہزار 299 ڈالر پر آ گیا ہے۔ ماہرین کے مطابق عالمی سطح پر سرمایہ کاروں کے محتاط رویے، ڈالر کی قدر میں اتار چڑھاؤ اور مالیاتی پالیسیوں سے متعلق غیر یقینی صورتحال کے باعث قیمتی دھاتوں کی قیمتوں میں یہ ردوبدل سامنے آیا ہے۔
صرافہ بازار سے وابستہ افراد کا کہنا ہے کہ اگر عالمی مارکیٹ میں سونے کی قیمتوں میں مزید کمی یا استحکام رہا تو مقامی سطح پر بھی قیمتیں نیچے آنے کا امکان ہے، تاہم کسی بھی بڑے رجحان کا انحصار بین الاقوامی معاشی حالات پر ہوگا۔
