دنیور نالے میں تودے گرنے سے 8 مقامی رضاکار ملبے تلے دب گئے، متعدد افراد کے پھنسے ہونے کا خدشہ، ریسکیو اور ایمرجنسی نافذ۔
گلگت،دنیور نالے میں اچانک مٹی کا بڑا تودہ گرنے کے باعث 8 مقامی رضاکار ملبے تلے دب کر جاں بحق ہو گئے جبکہ متعدد افراد کے پھنسے ہونے کا خدشہ ظاہر کیا جا رہا ہے۔
نجی ٹی وی کو پولیس ذرائع نے بتایا کہ یہ رضاکار سیلاب سے متاثرہ واٹر چینل کی مرمت اور بحالی میں مصروف تھے کہ اسی دوران تودہ گر گیا اور کئی افراد اس کی زد میں آ گئے۔
مقامی اسپتال ذرائع کے مطابق حادثے میں جاں بحق ہونے والے تمام افراد رضاکار ٹیم کے ممبر تھے جب کہ تین زخمیوں کو طبی امداد دی جا رہی ہے۔ مزید افراد کی تلاش کے لیے ریسکیو آپریشن جاری ہے اور مقامی آبادی بھی امدادی سرگرمیوں میں حصہ لے رہی ہے۔
ضلعی انتظامیہ نے متاثرہ اسپتالوں میں ایمرجنسی نافذ کر دی ہے تاکہ زخمیوں کو فوری علاج فراہم کیا جا سکے۔
صوبائی حکومت کے ترجمان نے بتایا کہ گلگت بلتستان میں موسمیاتی تبدیلیوں کی شدت میں اضافہ ہوا ہے جس کی وجہ سے گلیشیئرز پگھل کر نالوں میں پانی کا بہاؤ بڑھ گیا ہے۔ شیشپر نالے میں سیلاب کی وجہ سے قریبی آبادیوں کی زمینیں، کھیت، باغات اور درخت بہہ گئے اور قراقرم ہائی وے کا ایک حصہ بھی متاثر ہو کر شاہراہ ہنزہ کو بند کر دیا گیا ہے۔
اس بندش کے بعد ہنزہ جانے والی ٹریفک کو متبادل راستے نگر روڈ سے گزارا جا رہا ہے۔ حکام نے ممکنہ مزید بارشوں اور لینڈ سلائیڈنگ کے خدشے کے پیش نظر شہریوں کو احتیاط برتنے کی ہدایت کی ہے تاکہ نقصان سے بچا جا سکے۔
