پشاور: گورنر خیبرپختونخوا فیصل کریم کنڈی کا کہنا ہے کہ سابق ڈی جی آئی ایس آئی جنرل فیض حمید کو سنائی گئی سزا سے ملک کی سیاست پر مثبت اثرات مرتب ہوں گے۔ میڈیا سے گفتگو کرتے ہوئے انہوں نے کہا کہ اگر اس معاملے میں مزید لوگ ملوث ہوئے تو انہیں بھی سزا دی جائے گی، کیونکہ قانون سب کے لیے برابر ہے۔
فیصل کریم کنڈی نے کہا کہ بانی پی ٹی آئی کوئی آسمان سے نہیں اترے کہ انہیں سزا نہ ہو۔ انہوں نے پنجاب حکومت کو مشورہ دیتے ہوئے کہا کہ بانی پی ٹی آئی کو کسی اور مقام پر منتقل کر دیا جائے۔ گورنر کا کہنا تھا کہ اس وقت صورتحال یہ ہے کہ ’’اڈیالہ سے صوبہ چلایا جارہا ہے‘‘ اور سیکریٹریٹ عملی طور پر وہیں منتقل ہو چکا ہے، جس کے باعث افسروں میں شدید کنفیوژن ہے کہ کس کے احکامات کو ترجیح دی جائے۔
انہوں نے مزید کہا کہ خیبرپختونخوا ایک حساس صوبہ ہے، لہذا وفاق اور صوبائی حکومت کا ایک پیج پر ہونا بےحد ضروری ہے۔ گورنر نے خدشہ ظاہر کیا کہ جب وزیراعلیٰ کسی ڈی پی او کو انگلی اٹھا کر ڈانٹیں گے تو پولیس کا مورال کیسے برقرار رہ سکے گا۔
