لاہور میں پولیس نے سابق ایڈیشنل ڈپٹی کمشنر ریونیو (اے ڈی سی آر) سیالکوٹ اقبال سنگھیڑا کو حراست سے فرار ہونے کے بعد دوبارہ گرفتار کرلیا ہے۔ اقبال سنگھیڑا ایک نجی ہاؤسنگ سوسائٹی سے کروڑوں روپے رشوت لینے کے مقدمے میں مطلوب تھے اور ان کے خلاف اینٹی کرپشن عدالت میں کیس زیرِ سماعت ہے۔
پولیس ذرائع کے مطابق 13 نومبر کو ملزم کو لاہور سے راولپنڈی اینٹی کرپشن عدالت میں پیشی کے لیے لے جایا جارہا تھا کہ راستے میں چکری موٹروے ریسٹ ایریا پر وہ ڈرامائی انداز میں پولیس کی حراست سے فرار ہوگئے۔ ملزم کے فرار ہونے کے بعد تھانہ چکری میں مقدمہ درج کیا گیا، جس میں اے ایس آئی سمیت چار پولیس اہلکاروں کو غفلت اور سہولت کاری کے الزام میں نامزد کیا گیا۔
ملزم کی دوبارہ گرفتاری کے لیے راولپنڈی پولیس نے خصوصی ٹیم تشکیل دی تھی، جس نے خفیہ اطلاعات کی بنیاد پر کارروائی کرتے ہوئے اقبال سنگھیڑا کو دوبارہ گرفتار کر لیا۔ پولیس کے مطابق ملزم کو قانونی کارروائی مکمل ہونے تک کوٹ لکھپت جیل منتقل کردیا گیا ہے۔
