پنجاب میں مون سون بارشوں کے دسویں اسپیل کے پیش نظر پی ڈی ایم اے (پنجاب ڈیزاسٹر مینجمنٹ اتھارٹی) نے صوبے بھر کے لیے ہائی الرٹ جاری کر دیا ہے۔
ادارے نے 6 سے 9 ستمبر کے دوران شدید طوفانی بارشوں، فلیش فلڈنگ اور شہری سیلاب کے خدشے کے پیش نظر تمام متعلقہ محکموں کو تیار رہنے کی ہدایت دی ہے۔
پی ڈی ایم اے کے ترجمان کے مطابق، راولپنڈی، مری، گلیات، اٹک، چکوال، جہلم، گجرانوالہ، لاہور، گجرات اور سیالکوٹ سمیت متعدد اضلاع میں بارشیں متوقع ہیں۔ اس کے علاوہ نارووال، حافظ آباد، منڈی بہاؤالدین، اوکاڑہ، ساہیوال، قصور، جھنگ، سرگودھا، میانوالی، ڈیرہ غازی خان، ملتان اور راجن پور کے علاقوں میں بھی بارش کا امکان ظاہر کیا گیا ہے۔
ترجمان نے خبردار کیا کہ 7 سے 9 ستمبر کے دوران ڈیرہ غازی خان کی رودکوہیوں میں فلیش فلڈنگ کا شدید خدشہ ہے۔ دریائے چناب، راوی اور ستلج میں پانی کی سطح بلند ہونے سے سیلابی صورتحال پیدا ہو سکتی ہے جبکہ بڑے شہروں میں نشیبی علاقے متاثر ہونے کا امکان ہے۔
ڈی جی پی ڈی ایم اے، عرفان علی کاٹھیا کا کہنا ہے کہ تمام کمشنرز، ڈپٹی کمشنرز، محکمہ صحت، آبپاشی، تعمیر و مواصلات، لوکل گورنمنٹ اور لائیو اسٹاک کو الرٹ جاری کر دیا گیا ہے۔ انہوں نے شہریوں کو تاکید کی کہ وہ خراب موسم کے دوران احتیاطی تدابیر اختیار کریں، دریاؤں اور نالوں کے قریب جانے سے گریز کریں اور غیر ضروری سفر نہ کریں۔
پی ڈی ایم اے نے عوام سے درخواست کی ہے کہ ہنگامی صورتحال میں فوری طور پر ریسکیو ہیلپ لائن 1129 پر رابطہ کریں تاکہ بروقت امداد ممکن بنائی جا سکے۔
