راولپنڈی: چیف آف آرمی اسٹاف فیلڈ مارشل سید عاصم منیر نے واضح کیا ہے کہ پاکستان خطے میں امن و استحکام کا خواہاں ہے، تاہم ملکی سالمیت یا علاقائی خودمختاری پر کسی بھی براہِ راست یا بالواسطہ خلاف ورزی کا سخت اور فیصلہ کن جواب دیا جائے گا۔
پاک فوج کے شعبہ تعلقاتِ عامہ (آئی ایس پی آر) کے مطابق فیلڈ مارشل عاصم منیر نے جنرل ہیڈکوارٹرز راولپنڈی میں منعقدہ 17ویں نیشنل ورکشاپ بلوچستان کے شرکاء سے خطاب کیا۔
انہوں نے کہا کہ بلوچستان پاکستان کا فخر ہے جو باصلاحیت، محبِ وطن اور پُرعزم عوام کی سرزمین ہے، عوام ہی صوبے کا اصل سرمایہ ہیں۔ ان کا کہنا تھا کہ عوامی فلاح پر مبنی حکمتِ عملی کے ذریعے بلوچستان کے سماجی و معاشی منظرنامے کو بہتر بنانے کے لیے جامع اقدامات جاری ہیں، اور صوبے کی بے پناہ معاشی صلاحیت کو عوام کی خوشحالی کے لیے بروئے کار لانا وقت کی اہم ضرورت ہے۔
فیلڈ مارشل نے سول سوسائٹی اور نوجوانوں کے کردار کو سراہتے ہوئے کہا کہ نوجوان بلوچستان کی پائیدار ترقی میں ریڑھ کی ہڈی کی حیثیت رکھتے ہیں، بشرطیکہ وہ ذاتی و سیاسی مفادات سے بالاتر ہو کر صوبے کی خوشحالی کے لیے کام کریں۔
بھارت کو خبردار کرتا ہوں نیوکلیئر انوائرمنٹ میں جنگ کیلئے گنجائش نہیں: فیلڈ مارشل
انہوں نے کہا کہ بھارت کے حمایت یافتہ عناصر، فتنۃ الخوارج اور فتنۃ الہندوستان منفی پروپیگنڈے کے ذریعے عوام دشمن اور ترقی مخالف ایجنڈا پھیلا رہے ہیں، تاہم ریاست ان تمام دہشت گردوں کے خلاف بھرپور کارروائیاں کر رہی ہے تاکہ بلوچستان کو ان کے شر سے مکمل طور پر پاک کیا جا سکے۔
فیلڈ مارشل نے کہا کہ پاک فوج عوام کی جان و مال کے تحفظ کے لیے ہر ممکن اقدام کرے گی، اور قومی سالمیت کی ہر خلاف ورزی کا جواب سختی اور پوری قوت کے ساتھ دیا جائے گا۔
ورکشاپ کا اختتام ایک جامع اور معلوماتی سوال و جواب کے سیشن پر ہوا۔
