9
پشاور، وفاقی تحقیقاتی ادارہ (ایف آئی اے) اور ایئرپورٹ سیکیورٹی فورس (اے ایس ایف) نے مشترکہ کارروائی کرتے ہوئے کروڑوں روپے مالیت کے سونے کی بیرون ملک اسمگلنگ ناکام بنا دی۔
ایف آئی اے کے ترجمان کے مطابق کمرشل بینکنگ سرکل پشاور اور اے ایس ایف کی مشترکہ کارروائی میں پاکستان انٹرنیشنل ایئرلائنز (پی آئی اے) کے دو اہلکار ناصر خان اور شاہد اللہ گرفتار ہوئے۔
گرفتار ملزمان باچا خان انٹرنیشنل ائیرپورٹ پشاور سے پکڑے گئے، جن کے قبضے سے 7740 گرام سونا برآمد کیا گیا۔ ملزمان پشاور ائیرپورٹ پر تعینات تھے اور وہ برآمد شدہ سونا بیرون ملک اسمگل کرنے کی کوشش کر رہے تھے۔
ترجمان نے بتایا کہ گرفتار ملزمان کا دو روزہ جسمانی ریمانڈ حاصل کر لیا گیا ہے اور ان سے مزید تفتیش جاری ہے۔ ساتھ ہی دیگر ملزمان کی گرفتاری کے لیے کارروائیاں بھی جاری ہیں۔
