فیڈرل انویسٹی گیشن ایجنسی (ایف آئی اے) نے سال 2025 کے لیے انسانی اسمگلرز کی نئی ریڈ بک جاری کر دی ہے، جس میں 143 انتہائی مطلوب انسانی اسمگلرز کے نام شامل کیے گئے ہیں۔ اس فہرست میں 6 خواتین اسمگلرز کے نام بھی شامل ہیں، جو کہ اس خطرناک جرم میں ملوث ہونے کے باعث ایف آئی اے کو مطلوب ہیں۔
ترجمان ایف آئی اے کے مطابق یہ انسانی اسمگلرز کی 13ویں ریڈ بک ہے، جب کہ اس سے پہلے سال 2023 میں 156 ملزمان پر مشتمل ریڈ بک شائع کی گئی تھی۔ اس بار تعداد کچھ کم ہے، لیکن مجرموں کی سرگرمیاں بدستور تشویشناک ہیں۔
ریڈ بک کے مطابق سب سے زیادہ مطلوب انسانی اسمگلرز کا تعلق گوجرانوالہ زون سے ہے، جہاں کے 70 ملزمان اس فہرست میں شامل ہیں۔ دیگر زونز کی تفصیل درج ذیل ہے:
- اسلام آباد زون: 25 انسانی اسمگلرز
- لاہور زون: 14 انسانی اسمگلرز
- فیصل آباد زون: 13 انسانی اسمگلرز
- کراچی زون: 10 انسانی اسمگلرز
- ملتان زون: 3 انسانی اسمگلرز
- بلوچستان و کے پی زون: 1، 1 انسانی اسمگلر
ایف آئی اے نے ان اسمگلرز کی گرفتاری کے لیے خصوصی ٹیمیں تشکیل دینے کا فیصلہ کیا ہے۔ علاوہ ازیں، جو افراد بیرونِ ملک روپوش ہیں، ان کے خلاف ریڈ نوٹسز بھی جاری کر دیے گئے ہیں تاکہ بین الاقوامی سطح پر ان کا تعاقب ممکن بنایا جا سکے۔
بیرون ملک ملازمت کا جھانسہ: ایف آئی اے کی کارروائی، انسانی اسمگلرز گرفتار
یہ اقدام ملک میں انسانی اسمگلنگ کی روک تھام اور قانون نافذ کرنے والے اداروں کی کارروائیوں میں شفافیت لانے کی ایک اہم کڑی ہے۔ ایف آئی اے کا کہنا ہے کہ وہ انسانی اسمگلنگ جیسے جرائم کے خلاف سخت اقدامات جاری رکھے گی۔
