وفاقی ہائر ایجوکیشن کمیشن کے چیئرمین ڈاکٹر مختار احمد کی مدت 29 جولائی کو ختم ہو رہی ہے، ممکنہ عبوری چیئرمین کے لیے نامزد افراد کی سمری وزیراعظم کو بھیجے جانے کا امکان۔
اسلام آباد: وفاقی ہائر ایجوکیشن کمیشن (ایچ ای سی) کے چیئرمین ڈاکٹر مختار احمد کی مدتِ ملازمت منگل، 29 جولائی 2025 کو مکمل ہو رہی ہے، جس کے ساتھ ان کی ایک سالہ متنازع توسیع کا بھی خاتمہ ہو جائے گا۔
ڈاکٹر مختار احمد پہلے ہی ایچ ای سی کے چیئرمین کے طور پر دو مرتبہ اپنی مدت مکمل کر چکے ہیں، جس کے بعد گزشتہ برس انہیں ایک سال کی غیر معمولی توسیع دی گئی تھی۔ اب ان کے عہدے کے خاتمے کے بعد ایچ ای سی آرڈیننس کی شق 8(3) کے تحت وزیراعظم — بطور کنٹرولنگ اتھارٹی — کمیشن کے کسی موجودہ رکن کو تین ماہ کے لیے عبوری چیئرمین مقرر کر سکتے ہیں۔
ذرائع کے مطابق وفاقی وزارت تعلیم و پیشہ ورانہ تربیت عبوری چیئرمین کے تقرر کے لیے ایک سمری تیار کر رہی ہے جس میں کمیشن کے ان اراکین کے نام شامل کیے جا رہے ہیں جو اس عہدے کے لیے اہل ہیں۔ سمری منظوری کے لیے وزیراعظم شہباز شریف کو ارسال کی جائے گی۔
ممکنہ عبوری چیئرمین کے امیدواروں میں ڈاکٹر احسان اللہ کاکڑ (بلوچستان)، ڈاکٹر ثمرین حسین (سندھ)، ڈاکٹر سروش لودھی (سندھ)، ڈاکٹر سمیرا رحمٰن (پنجاب) اور وفاقی سیکریٹری تعلیم (اسلام آباد) شامل ہیں۔
ایچ ای سی آرڈیننس کے مطابق عبوری تقرری کی مدت تین ماہ سے زائد نہیں ہو سکتی، اس دوران وزیراعظم کو مستقل چیئرمین کا انتخاب کرنا ہوگا۔
