وفاقی حکومت نے فرنٹیئر کانسٹیبلری کو ملک گیر فیڈرل فورس بنانے کا فیصلہ کرلیا، آرڈیننس کے ذریعے نئی فورس پورے پاکستان میں کام کرے گی۔
اسلام آباد، وفاقی حکومت نے فرنٹیئر کانسٹیبلری (ایف سی) کو ایک ملک گیر وفاقی فورس میں تبدیل کرنے کا فیصلہ کرلیا ہے، جس کا مقصد داخلی سلامتی اور امن و امان کی صورتحال کو مؤثر انداز میں بہتر بنانا ہے۔ باخبر ذرائع کے مطابق، وفاقی کابینہ کی منظوری سے فرنٹیئر کانسٹیبلری ایکٹ 1915 میں ترامیم کی جائیں گی، جس کے بعد ایک نیا آرڈیننس جاری کیا جائے گا۔
اس اہم فیصلے کے تحت فرنٹیئر کانسٹیبلری کا نام تبدیل کرکے "فیڈرل کانسٹیبلری” رکھا جائے گا اور اس نئی فورس کو چاروں صوبوں، وفاقی دارالحکومت اسلام آباد، آزاد جموں و کشمیر اور گلگت بلتستان میں تعینات کرنے کا اختیار حاصل ہوگا۔
ذرائع کا کہنا ہے کہ آرڈیننس کے نفاذ کے بعد فیڈرل کانسٹیبلری کے لیے ملک بھر میں نئی بھرتیوں کا آغاز کیا جائے گا اور اس مقصد کے لیے پاکستان کے مختلف شہروں میں دفاتر بھی قائم کیے جائیں گے تاکہ ایک جامع اور فعال نظام تشکیل دیا جا سکے۔
عبدالعلیم خان کا خانیوال میں شہید غلام سعید کے گھر تعزیت، بھارت پر دہشتگردی کا الزام
ذرائع کے مطابق، اس نئی فورس کی کمانڈ پولیس سروس آف پاکستان کے سینئر افسران کریں گے اور اسے ایک مربوط تنظیمی ڈھانچے کے تحت منظم کیا جائے گا۔ اس تنظیمِ نو سے امید کی جا رہی ہے کہ امنِ عامہ کے قیام، جرائم پر قابو پانے اور ہنگامی حالات سے نمٹنے میں حکومت کو اہم مدد ملے گی۔
یاد رہے کہ فرنٹیئر کانسٹیبلری ماضی میں محدود دائرۂ کار کے تحت مخصوص علاقوں میں تعینات ہوتی تھی، تاہم بڑھتی ہوئی سیکیورٹی ضروریات کے پیش نظر اسے قومی سطح پر ایک بااختیار فورس بنانے کی سمت میں یہ ایک اہم پیش رفت تصور کی جا رہی ہے۔
