10
پشاور میں جمعیت علمائے اسلام (ف) کے سربراہ مولانا فضل الرحمان نے کہا ہے کہ اگر 28ویں آئینی ترمیم پیش کی گئی تو اسے بھی پوری طرح دیکھا اور پرکھا جائے گا۔
انہوں نے کہا کہ ہمیں پسپائی کی ضرورت نہیں، جو بات حق سمجھیں گے وہی کریں گے۔
اے آر وائی نیوز سے گفتگو کرتے ہوئے مولانا فضل الرحمان کا کہنا تھا کہ وہ خود اپوزیشن کا کردار ادا کر رہے ہیں اور خیبرپختونخوا کے ساتھ ساتھ وفاق میں بھی اپوزیشن کی ذمہ داریاں پوری کر رہے ہیں۔
ان کا کہنا تھا کہ اسمبلی اور اس سے منظور شدہ بلوں میں موجود خامیاں قوم کے سامنے لائی جائیں گی۔
سربراہ جے یو آئی (ف) نے کہا کہ ملک میں سیاست کو تدريجاً ختم کیا جارہا ہے، جس سے پارلیمنٹ کی اہمیت بری طرح متاثر ہو رہی ہے۔
انہوں نے خبردار کیا کہ اس صورتحال سے پاکستان کا سول نظام غیر مؤثر ہو جائے گا۔ ان کا کہنا تھا کہ سیاستدان حکمران نہیں رہے بلکہ استعمال ہو رہے ہیں، جو جمہوریت کے لیے نہایت تشویشناک ہے۔
