سابق وزیر فیاض الحسن چوہان نے کہا ہے کہ خیبر پختونخوا کی پرفارمنس باقی صوبوں کے مقابلے میں انتہائی خراب ہے اور صوبے میں انتظامی ناکامی کی مثالیں ہر طرف پائی جاتی ہیں۔ اُن کے مطابق صوبے میں قانون اور امن و امان کا فقدان ہے، تعلیمی مواقع محدود ہیں اور نئے سکول، کالج یا یونیورسٹیز کا قیام نہیں ہوا۔ علاوہ ازیں، صوبے کا آدھا حصہ ٹی ٹی پی کے کنٹرول میں ہے اور عوام کی جان و مال محفوظ نہیں۔
فیاض الحسن چوہان نے صوبے میں کرپشن اور انتظامی سسٹم کے بگاڑ پر بھی شدید تنقید کی۔ اُن کے مطابق صوبائی حکومت کی نااہلی کی وجہ سے ریاست کا وجود اور تحفظ داؤ پر لگا ہوا ہے، جبکہ زراعت، صنعت اور تجارت کا نظام بھی برباد ہو رہا ہے۔ انہوں نے کہا کہ صوبے میں نکماپن، نکھٹوپن اور نالائقی کی سینکڑوں مثالیں موجود ہیں۔
سابق وزیر نے ماہر معاشیات اور ٹیکنوکریٹس پر بھی تنقید کی اور کہا کہ انہیں اپنی انتظامی پرفارمنس پر توجہ دینی چاہیے، نہ کہ عوام کو بیوقوف بنانے کی کوشش کرنی چاہیے۔ اُن کا کہنا تھا کہ عوام کو حقیقت کی خبر دینا اور مسائل کا حل تلاش کرنا کسی بھی ماہر یا تکنیکی ماہر کی اصل ذمہ داری ہونی چاہیے۔
