فواد چودھری نے کہا ہے کہ مستقبل کی سیاست صرف بانی پی ٹی آئی عمران خان کے گرد گھومتی ہے، موجودہ قیادت عوامی حمایت سے محروم ہے۔
لاہور، سابق وفاقی وزیر فواد چودھری نے کہا ہے کہ ملک کی مستقبل کی سیاست بانی پاکستان تحریک انصاف عمران خان کے ساتھ وابستہ ہے، اور جو بھی نئی جماعتیں بنیں گی، وہ عوامی پذیرائی حاصل نہیں کر سکیں گی۔
لاہور ہائیکورٹ میں میڈیا سے گفتگو کرتے ہوئے ان کا کہنا تھا کہ پاکستان میں مزید سیاسی جماعتوں کی گنجائش نہیں، اور اگر کوئی نئی جماعت بنی بھی، تو وہ ریحام خان کی پارٹی جیسی غیر مؤثر ہو گی۔
انہوں نے الزام عائد کیا کہ عمران خان کو جیل میں رکھنے کی کوششیں دراصل ان کی سیاسی قیادت کو کمزور کرنے کی سازش ہے، اور اس سازش میں موجودہ پی ٹی آئی قیادت بھی شریک ہے۔ فواد چودھری کے مطابق اصل مسئلہ بانی تحریک انصاف کی رہائی ہے، کیونکہ جب تک وہ آزاد نہیں ہوں گے، حقیقی سیاسی جدوجہد ممکن نہیں۔
فواد چودھری نے پی ٹی آئی کی موجودہ قیادت پر تنقید کرتے ہوئے کہا کہ وہ کسی تحریک کو منظم کرنے یا عوامی حمایت حاصل کرنے کے اہل نہیں ہیں۔ انہوں نے خاص طور پر عالیہ حمزہ کا ذکر کرتے ہوئے کہا کہ ان کا موجودہ تحریک میں کوئی کردار نہیں ہے۔ ساتھ ہی یہ عندیہ دیا کہ اگر بانی پی ٹی آئی کے بیٹے سیاست میں آتے ہیں تو ملک کے سیاسی منظرنامے میں تبدیلی آ سکتی ہے۔
اپنے خلاف قانونی کارروائیوں پر بات کرتے ہوئے انہوں نے مؤقف اپنایا کہ ان کے خلاف درج مقدمات کی کوئی قانونی حیثیت نہیں، اور انسداد دہشتگردی عدالت (اے ٹی سی) کا فیصلہ سیاسی ماحول کو مزید گرم کر دے گا۔
یاد رہے کہ: فواد چودھری، جو ماضی میں عمران خان کے قریبی ساتھی اور وفاقی وزیر اطلاعات رہ چکے ہیں، کچھ عرصے سے پارٹی قیادت پر کھل کر تنقید کر رہے ہیں اور عمران خان کی غیر موجودگی میں پارٹی کی سمت پر سوالات اٹھا چکے ہیں۔ ان کے حالیہ بیانات سے تحریک انصاف کے اندرونی اختلافات اور قیادت کے بحران پر مزید روشنی پڑتی ہے۔
