کراچی میں سرکاری ملازم پر تشدد اور کار سرکار میں مداخلت کے مقدمے میں گرفتار سعید غنی کے بھائی فرحان غنی کو ایک روزہ راہداری ریمانڈ پر پولیس کے حوالے کر دیا گیا، مقدمہ انسداد دہشت گردی دفعات کے تحت درج ہے۔
کراچی، سرکاری ملازم پر تشدد اور کار سرکار میں مداخلت کے مقدمے میں گرفتار وزیر بلدیات سندھ سعید غنی کے بھائی اور چیئرمین چنیسر ٹاؤن فرحان غنی کو راہداری ریمانڈ پر پولیس کے حوالے کر دیا گیا۔
پولیس کے مطابق فرحان غنی کو اسپیشل ڈیوٹی مجسٹریٹ کی عدالت میں پیش کیا گیا، جہاں تفتیشی افسر کے بیان کی روشنی میں عدالت نے انہیں ایک روز کے راہداری ریمانڈ پر پولیس کے حوالے کر دیا۔
پولیس کا کہنا ہے کہ ملزمان کے خلاف مقدمہ انسداد دہشت گردی دفعات کے تحت فیروز آباد تھانے میں درج کیا گیا ہے، جس کے تحت ملزمان کو کل انسداد دہشت گردی کی منتظم عدالت کے روبرو پیش کیا جائے گا۔
ذرائع کے مطابق فرحان غنی اور دیگر ملزمان کے بیانات قلمبند کیے گئے ہیں۔ مقدمہ سرکاری ملازم کی مدعیت میں درج کیا گیا، جس میں انسداد دہشت گردی، اقدام قتل اور دیگر سنگین دفعات شامل ہیں۔
گرفتار ملزمان میں فرحان غنی کے ساتھ قمر احمد خان، شکیل چانڈیو، سکندر اور روحان بھی شامل ہیں۔
