سینیٹر فیصل واوڈا نے دعویٰ کیا ہے کہ پاکستان تحریک انصاف (پی ٹی آئی) کے اندرونی معاملات میں سنگین سازشیں جاری ہیں اور پارٹی کے بعض اہم رہنما بانی چیئرمین عمران خان کے خلاف کام کر رہے ہیں۔ انہوں نے کہا کہ وہ جلد وطن واپسی پر ان تمام حقائق کو قوم کے سامنے رکھیں گے۔
سماجی رابطوں کی ویب سائٹ ایکس (سابقہ ٹوئٹر) پر اپنی تازہ پوسٹ میں فیصل واوڈا نے لکھا کہ عمران خان کی پیٹھ میں چُھرا گھونپنے والوں میں ان کے قریبی لوگ بھی شامل ہیں۔ انہوں نے خاص طور پر خیبر پختونخوا کے وزیراعلیٰ علی امین گنڈا پور کا ذکر کرتے ہوئے کہا کہ وہ اپنے اقتدار کے آخری مراحل میں ہیں اور اب بھی خود کو بچانے کی کوششوں میں مصروف ہیں۔
واوڈا کا کہنا تھا کہ سینیٹ میں پی ٹی آئی کی ممکنہ نشستوں کی تعداد آٹھ سے کم ہو کر پانچ کیسے ہوئی، مراد سعید کو سینیٹر بنانے کے پس منظر میں کیا کہانی ہے، اور پارٹی کے اندر اربوں روپے کے لین دین کی تفصیلات کیا ہیں — یہ سب وہ جلد سامنے لائیں گے۔
انہوں نے دعویٰ کیا کہ پی ٹی آئی کے کچھ رہنما اداروں کو بدنام کرنے کی منظم کوششوں میں ملوث ہیں اور اس کے پیچھے ایک ’’خطرناک منصوبہ‘‘ کارفرما ہے، جسے وہ جلد بے نقاب کریں گے۔
فیصل واوڈا نے خبردار کیا کہ وہ ملک میں دوبارہ ’’ارشد شریف جیسے سانحے‘‘ کو دہرانے کی اجازت نہیں دیں گے اور جو بھی اس منصوبے کا حصہ ہے، اسے بے نقاب کیا جائے گا۔
واوڈا کے ان بیانات سے پی ٹی آئی کی اندرونی کشمکش اور ممکنہ تقسیم کی نئی بحث چھڑ گئی ہے، جبکہ پارٹی قیادت کی جانب سے فی الحال ان دعوؤں پر کوئی سرکاری ردعمل سامنے نہیں آیا۔
