نیپرا 4 اگست کو بجلی کی قیمتوں میں ممکنہ کمی پر سماعت کرے گا، 53 ارب روپے سے زائد ریلیف ملنے کا امکان۔
اسلام آباد سے موصولہ اطلاعات کے مطابق ملک بھر کے بجلی صارفین کے لیے بڑی خوشخبری سامنے آئی ہے، کیونکہ بجلی کی قیمت میں ایک روپے 75 پیسے فی یونٹ تک کمی کا امکان ظاہر کیا جا رہا ہے۔
سنٹرل پاور پرچیزنگ ایجنسی (سی پی پی اے) نے نیپرا میں مالی سال 2024-25 کی چوتھی سہ ماہی ایڈجسٹمنٹ کی مد میں باضابطہ درخواست جمع کرا دی ہے۔ درخواست میں کہا گیا ہے کہ اگر یہ کمی منظور ہو جاتی ہے تو مجموعی طور پر صارفین کو 53 ارب 39 کروڑ روپے سے زائد کا ریلیف مل سکتا ہے، جو ملک کے عوام کے لیے ایک خوش آئند پیش رفت ہوگی۔
یہ سہ ماہی ایڈجسٹمنٹ کے-الیکٹرک سمیت تمام سرکاری ڈسکوز پر لاگو ہوگی، جس سے پورے ملک کے بجلی صارفین مستفید ہوں گے۔ نیپرا نے اس درخواست پر سماعت کے لیے 4 اگست کی تاریخ مقرر کی ہے، جس کے بعد ہی بجلی کی قیمتوں میں کمی کا حتمی فیصلہ سنایا جائے گا۔
200 سے 400 یونٹ استعمال کرنے والوں کیلئے ریلیف کی امید
دلچسپ بات یہ ہے کہ اگر ستمبر، اکتوبر اور نومبر کے لیے قیمتوں میں ایڈجسٹمنٹ کی منظوری دی جاتی ہے تو فی یونٹ ریلیف کی مقدار 2 روپے 10 پیسے تک پہنچ سکتی ہے، جو صارفین کو مزید مالی سہولت فراہم کرے گی۔ تاہم، اس حوالے سے حتمی فیصلہ نیپرا کی جانب سے سماعت کے بعد ہی متوقع ہے۔
نیپرا سہ ماہی ایڈجسٹمنٹس کے تحت بجلی کی قیمتوں کا جائزہ لیتا ہے، اور حالیہ مہنگائی کے پس منظر میں یہ ممکنہ ریلیف عوام کے لیے کسی ریلیف پیکیج سے کم نہیں ہوگا۔
