آئی جی پنجاب ڈاکٹر عثمان انور نے پولیس کو ہدایت کی ہے کہ عیدالاضحیٰ پر امن و امان کو یقینی بنایا جائے، مشکوک افراد اور گاڑیوں کی چیکنگ سخت کی جائے، مویشی منڈیوں کی سکیورٹی بھی بڑھائی جائے۔
لاہور، آئی جی پنجاب ڈاکٹر عثمان انور نے عیدالاضحیٰ کے موقع پر پولیس کو سکیورٹی اور لاء اینڈ آرڈر یقینی بنانے کی سخت ہدایات جاری کر دی ہیں۔ اس سلسلے میں ان کی زیر صدارت ایک اہم اجلاس ہوا جس میں امن و امان، داخلی و خارجی راستوں کی نگرانی، مویشی منڈیوں اور عوامی مقامات کی سکیورٹی کا تفصیلی جائزہ لیا گیا۔ انہوں نے کہا کہ شکست خوردہ دشمن عید کے موقع پر امن سبوتاژ کرنے کی کوشش کر سکتا ہے، اس لیے پولیس ہائی الرٹ رہے اور تمام اہلکار چوکس رہیں۔
انہوں نے حکم دیا کہ سرحدی و دریائی چوکیوں سمیت تمام داخلی و خارجی راستوں پر مشکوک افراد اور گاڑیوں کی چیکنگ سخت کر دی جائے، جبکہ مویشی منڈیوں کی سکیورٹی کو بھی مزید مؤثر بنایا جائے۔
انہوں نے واضح طور پر ہدایت کی کہ عید کے دوران کالعدم یا غیر رجسٹرڈ تنظیموں کو قربانی کی کھالیں یا چندہ جمع کرنے کی اجازت نہ دی جائے، اور اس ضمن میں پیشگی انسدادی اقدامات کو یقینی بنایا جائے۔
ڈاکٹر عثمان انور نے پولیس کو مزید ہدایات دیتے ہوئے کہا کہ پرانی دشمنیوں سے متعلق کیسز میں فریقین سے شورٹی بانڈز لیے جائیں تاکہ کسی ناخوشگوار واقعے سے بچا جا سکے۔ انہوں نے حساس مقامات پر ایلیٹ فورس اور کیو آر ایف ٹیمیں تعینات کرنے کا حکم بھی دیا۔
انہوں نے تمام افسران سے مطالبہ کیا کہ کی پرفارمنس انڈیکیٹرز کے تحت متعلقہ تفصیلات فوری طور پر ہیڈکوارٹرز کو بھجوائی جائیں، سی سی ٹی وی کیمروں سے مانیٹرنگ کا عمل، سرچ، سویپ اور کومبنگ آپریشنز مسلسل جاری رکھے جائیں۔ اس کے ساتھ ساتھ سمارٹ آئی، ہوٹل آئی، ٹریول آئی اور ڈیجیٹل پولیس پوسٹ گیجٹس کی مدد سے اشتہاری مجرموں کا ڈیٹا چیک کیا جائے اور کسی بھی مشکوک سرگرمی کو فوری طور پر رپورٹ کیا جائے۔
یاد رہے کہ ہر سال عیدالاضحیٰ کے موقع پر امن و امان قائم رکھنا پولیس کے لیے ایک بڑا چیلنج ہوتا ہے، ماضی میں بعض دہشتگرد عناصر نے ایسے مواقع کو نشانہ بنانے کی کوشش کی جس کے پیش نظر سکیورٹی انتظامات میں ہر سال اضافہ کیا جاتا ہے۔
عیدالاضحیٰ 2025 کی چاند دیکھنے کی پیش گوئی کے حوالے سے تازہ معلومات کے لیے آپ ہماری خاص رپورٹ یہاں دیکھ سکتے ہیں، جہاں عید کی تاریخ اور چاند نظر آنے کے امکانات تفصیل سے بیان کیے گئے ہیں۔
