اسلام آباد: فیلڈ مارشل جنرل سید عاصم منیر سے مصر کے وزیر خارجہ ڈاکٹر بدر احمد محمد عبدالعاطی نے اہم ملاقات کی، جس میں دوطرفہ دفاعی اور اسٹریٹجک تعاون پر تفصیلی گفتگو ہوئی۔
پاک فوج کے شعبہ تعلقات عامہ (آئی ایس پی آر) کے مطابق ملاقات میں پاکستان اور مصر کے درمیان مضبوط تعلقات، دفاعی تعاون، عسکری رابطوں میں اضافہ، تربیتی تعاون اور خطے میں امن و استحکام کے لیے مشترکہ کوششوں کا جائزہ لیا گیا۔
ملاقات کے دوران دونوں ممالک نے دفاع اور اسٹریٹجک شعبوں میں تعلقات کو مزید وسعت دینے کے عزم کا اظہار کیا۔ مصری وزیر خارجہ نے فیلڈ مارشل عاصم منیر کو مصر کی قیادت کی نیک خواہشات پہنچاتے ہوئے کہا کہ قاہرہ پاکستان کے ساتھ تمام شعبوں میں تعاون کو مزید بڑھانے میں گہری دلچسپی رکھتا ہے۔
ملاقات میں خطے میں سیکیورٹی کی بدلتی صورتحال پر بھی تبادلہ خیال کیا گیا اور اس بات پر زور دیا گیا کہ نئے چیلنجز سے نمٹنے کے لیے پاک–مصر اعلیٰ سطحی روابط کا تسلسل انتہائی ضروری ہے۔
