بلوچستان کے شہر پشین اور گرد و نواح میں زلزلے کے جھٹکے

پشین میں 4.4 شدت کا زلزلہ، شہری خوفزدہ، کلمہ طیبہ کا ورد شروع، کراچی میں یکم جون سے اب تک 42 جھٹکے محسوس کیے جا چکے ہیں۔

بلوچستان کے ضلع پشین میں آج صبح 4.4 شدت کا زلزلہ محسوس کیا گیا، جس سے علاقے میں خوف و ہراس پھیل گیا۔ زلزلہ پیما مرکز کے مطابق اس قدرتی جھٹکے کا مرکز پشین سے 21 کلومیٹر جنوب مشرق کی سمت میں، زمین کے 12 کلومیٹر اندر تھا۔ زلزلے کے بعد لوگ گھروں سے باہر نکل آئے اور کلمہ طیبہ کا ورد کرتے ہوئے کھلے میدانوں کا رخ کیا۔ اب تک کسی قسم کے جانی یا مالی نقصان کی اطلاع موصول نہیں ہوئی۔

دوسری جانب، کراچی میں زلزلے کے جھٹکوں کا سلسلہ مسلسل جاری ہے۔ گزشتہ روز شہر کے مختلف علاقوں میں دو زلزلے ریکارڈ کیے گئے جن کی شدت بالترتیب 2.5 اور 2.6 تھی۔ ان جھٹکوں کا مرکز ڈی ایچ اے سٹی کے اطراف میں 40 کلومیٹر گہرائی میں تھا۔ یکم جون سے اب تک کراچی میں زلزلے کے جھٹکوں کی تعداد 42 ہو چکی ہے، جس نے ماہرین کو بھی تشویش میں مبتلا کر دیا ہے۔