راشد منہاس روڈ حادثے میں بہن بھائی جاں بحق، ڈرائیور کے پاس ہیوی لائسنس نہیں، عدالت نے دو روزہ جسمانی ریمانڈ پر پولیس کے حوالے کر دیا۔
کراچی: راشد منہاس روڈ پر ڈمپر کی ٹکر سے بہن اور بھائی کو کچل کر جاں بحق کرنے والے ڈرائیور کو دو روزہ جسمانی ریمانڈ پر پولیس کے حوالے کر دیا گیا۔
جوڈیشل مجسٹریٹ وسطی کی عدالت میں پیشی کے دوران تفتیشی افسر نے بتایا کہ ملزم کے پاس ہیوی ٹریفک لائسنس موجود نہیں، صرف ایل ٹی وی لائسنس تھا جو 2016 میں ایکسپائر ہو چکا ہے۔ ملزم سے ڈمپر کے مالک کے بارے میں معلومات حاصل کرنی ہیں۔
پولیس کے مطابق حادثے کے بعد عوام کے تشدد سے ملزم کی آنکھ پر چوٹ آئی، واقعے کا مقدمہ تھانہ یوسف پلازا میں درج کیا گیا ہے۔ عدالت نے ملزم کو دو روزہ جسمانی ریمانڈ پر پولیس کے حوالے کرتے ہوئے سماعت ملتوی کر دی۔
یاد رہے، گزشتہ روز تیز رفتار ڈمپر نے موٹر سائیکل سوار بہن بھائی کو کچل دیا تھا، جس میں دونوں موقع پر جاں بحق جبکہ والد زخمی ہو گئے تھے۔ واقعے کے بعد مشتعل مظاہرین نے سات ڈمپروں کو آگ لگا دی تھی۔
سندھ کے سینئر وزیر شرجیل انعام میمن نے سندھ اسمبلی میں کہا کہ ڈرائیور کے خلاف کارروائی ہوگی، لیکن حادثے کے بعد ڈمپروں کو آگ لگانے والے ’شرارتی اور دہشت گرد ذہن‘ کے لوگ شہر کا امن خراب کرنا چاہتے ہیں، حکومت کسی کے دباؤ میں نہیں آئے گی۔
ادھر حادثے کی تحقیقات کے لیے 4 رکنی کمیٹی قائم کر دی گئی ہے۔ ٹریفک پولیس کی ابتدائی رپورٹ کے مطابق حادثے کے وقت سڑک گیلی تھی اور ممکنہ طور پر موٹر سائیکل دوسری گاڑی سے ٹکرا کر سلپ ہوئی، جس کے بعد پیچھے سے آنے والے خالی ڈمپر نے بہن بھائی کو روند ڈالا۔
