صوبہ خیبر پختونخوا کے ضلع ٹانک کے جنڈولہ ڈویژن اور جنوبی وزیرستان اپر و لوئر میں آج صبح 6 بجے سے شام 7 بجے تک سیکیورٹی خدشات کے پیش نظر کرفیو نافذ کر دیا گیا ہے۔
ضلعی انتظامیہ کے مطابق کرفیو کے احکامات تینوں اضلاع کے ڈپٹی کمشنرز کی جانب سے جاری کیے گئے ہیں۔ اس دوران تمام بازار، تجارتی مراکز اور اہم سڑکیں بند رہیں گی۔ ٹانک کے جنڈولہ ڈویژن میں جنڈولہ بازار مکمل بند ہے جبکہ کوڑ قلعہ سے جنڈولہ تک شاہراہ پر آمد و رفت پر بھی مکمل پابندی عائد کر دی گئی ہے۔
جنوبی وزیرستان اپر میں جنڈولہ تا مدیجان اور مولے خان سرائے تا تیارزہ بدر تک تمام سڑکوں پر ٹریفک کی آمد و رفت معطل ہے، جبکہ اسپین کائی رغزائی تا کوٹکئی روٹ بھی بند کر دیا گیا ہے۔
جنوبی وزیرستان لوئر میں بھی شکئی سمیت متعدد علاقوں میں کرفیو نافذ ہے۔ ڈپٹی کمشنر وانا مسرت زمان کے مطابق شکئی بازار مکمل بند رہے گا اور وانا تا تیارزہ گیٹ، کرب کوٹ، تنائی، عزیز آباد چوک تا درگئی پل تک آمد و رفت پر بھی مکمل پابندی عائد کر دی گئی ہے۔
شمالی وزیرستان میں دراندازی کی کوشش ناکام، 30 بھارتی حمایت یافتہ دہشت گرد ہلاک
حکام کے مطابق ایمرجنسی حالات میں سفر صرف شناختی کارڈ اور باقاعدہ اجازت نامے کے بعد ممکن ہوگا۔ عوام کو ہدایت کی گئی ہے کہ سیکیورٹی فورسز کی گاڑی نظر آنے پر اپنی گاڑی کم از کم 50 میٹر کے فاصلے پر روک دیں۔
کرفیو کے باعث متعدد مقامات پر گاڑیوں کی لمبی قطاریں لگ گئی ہیں اور شہریوں و مسافروں کو شدید مشکلات کا سامنا کرنا پڑ رہا ہے۔
