خاتون کے قتل کی اطلاع فوراً مل گئی تھی، ملزمان نے پولیس کو گمراہ کرنے کی کوشش کی، سی پی او راولپنڈی
راولپنڈی میں غیرت کے نام پر قتل کی جانے والی خاتون کے کیس میں نئے انکشافات سامنے آئے ہیں۔ سی پی او راولپنڈی سید خالد ہمدانی نے بتایا کہ خاتون کے قتل کی اطلاع پولیس کو اسی دن مل گئی تھی، جب لڑکی کی غیر فطری موت واقع ہوئی۔ تاہم مقتولہ کے اہل خانہ نے پولیس کو گمراہ کرنے کی کوشش کرتے ہوئے تین دن بعد اغوا کی درخواست دی۔
سی پی او راولپنڈی نے مزید بتایا کہ خاتون کو گھر میں قتل کرنے کے بعد اسی رات شدید بارش کے دوران دفنایا گیا اور قبر کا نشان مٹانے کی کوشش کی گئی تھی۔ تاہم، پولیس نے اپنی تفتیش کے دوران قتل کے معاملے کو بے نقاب کر لیا۔ ملزمان نے تفتیش میں شک ہونے پر قتل کی حقیقت پر پردہ ڈالنے کی کوشش کی اور اغوا اور پہلی شادی کا بہانہ بنایا، لیکن یہ صاف طور پر قتل کا کیس تھا۔
یاد رہے کہ 17 اور 18 جولائی کی درمیانی شب راولپنڈی کے پیر ودھائی تھانے کی حدود میں ایک شادی شدہ خاتون کو گلہ دبا کر قتل کر دیا گیا تھا اور راتوں رات تدفین بھی کر دی گئی۔
اب تک اس قتل کے معاملے میں آٹھ افراد کو گرفتار کیا جا چکا ہے، اور مقتولہ کے دوسرے شوہر عثمان نے خود کو پولیس کے حوالے کر دیا ہے۔ عثمان کے والد محمد الیاس نے کہا کہ لڑکی کے گھر والوں نے اسے رخصتی کے بہانے لے جایا، اور پھر دو دن بعد اطلاع ملی کہ لڑکی کو قتل کر دیا گیا ہے۔
