پشاور کی سیشن عدالت نے وزیراعلیٰ خیبرپختونخوا کے خلاف مقدمہ درج کرانے کی درخواست پر فریقین سے 12 جولائی تک جواب طلب کرلیا۔
پشاور، وزیراعلیٰ خیبرپختونخوا علی امین گنڈاپور کے خلاف مقدمہ درج کرانے کی غرض سے دفعہ 22-اے کے تحت درخواست پشاور کی سیشن عدالت میں دائر کی گئی ہے۔ ایڈیشنل ڈسٹرکٹ اینڈ سیشن جج عصمت اللہ وزیر نے کیس کی سماعت کرتے ہوئے تمام فریقین کو نوٹس جاری کر دیے ہیں اور 12 جولائی تک جواب طلب کیا ہے۔
درخواست گزار کے وکیل نے عدالت کو آگاہ کیا کہ وزیراعلیٰ خیبرپختونخوا نے لاہور بار ایسوسی ایشن کو 5 کروڑ روپے کے فنڈز فراہم کیے، جو خیبرپختونخوا کے عوام کی امانت تھے۔ وکیل کے مطابق ان فنڈز کا دوسرے صوبے میں استعمال امانت میں خیانت کے زمرے میں آتا ہے، جس سے وزیراعلیٰ کی صادق و امین ہونے کی حیثیت متاثر ہوتی ہے۔
درخواست میں مؤقف اختیار کیا گیا ہے کہ آئین پاکستان اور سپریم کورٹ کے فیصلے اس بات کی اجازت نہیں دیتے کہ عوامی فنڈز کو غیر متعلقہ یا غیر مقامی اداروں پر خرچ کیا جائے۔ درخواست گزار کا کہنا ہے کہ اس سلسلے میں متعلقہ پولیس افسران کو بھی درخواست دی گئی، مگر تاحال مقدمہ درج نہیں کیا گیا۔
خیبر پختونخوا میں اے این پی کو بڑا جھٹکا، اہم رہنما مسلم لیگ (ن) میں شامل
عدالت سے استدعا کی گئی ہے کہ وزیراعلیٰ کے خلاف مقدمہ درج کرنے کا حکم دیا جائے۔ عدالت نے ابتدائی سماعت کے بعد نوٹس جاری کرتے ہوئے فریقین سے 12 جولائی تک جواب طلب کیا ہے، جس کے بعد کیس کی مزید کارروائی ہوگی۔
یاد رہے کہ یہ معاملہ اس وقت سامنے آیا جب سوشل میڈیا اور قانونی حلقوں میں اس اقدام پر سوالات اٹھائے گئے کہ خیبرپختونخوا کے وسائل کو پنجاب کی بار ایسوسی ایشن کو منتقل کرنا آئینی اور اخلاقی طور پر درست ہے یا نہیں۔ یہ درخواست ایک اہم قانونی موڑ ثابت ہو سکتی ہے جو عوامی فنڈز کے استعمال کے ضوابط پر اثر انداز ہوگی۔
