راولپنڈی، آئی ایس پی آر کے مطابق فیلڈ مارشل سید عاصم منیر، نشان امتیاز (ملٹری)، چیف آف آرمی اسٹاف کی سربراہی میں 270 ویں کور کمانڈرز کانفرنس منعقد ہوئی جس میں ملکی اور علاقائی سکیورٹی کے چیلنجز اور مجموعی حفاظتی صورتحال کا تفصیلی جائزہ لیا گیا۔
فیلڈ مارشل سید عاصم منیر نے کہا کہ ہم بیرونی جارحیت، دہشت گردی اور انتہا پسندی کے خلاف جاری مشترکہ جدوجہد میں عوام کے اعتماد اور توقعات پر پورا اترنے کے لیے پرعزم ہیں۔
پاک فوج کے شعبہ تعلقات عامہ کے مطابق آرمی چیف نے پاکستان کے عوام کی غیر متزلزل حمایت کو خراج تحسین پیش کرتے ہوئے کہا کہ پاکستانی عوام ہماری طاقت کی اصل بنیاد ہیں۔
کانفرنس کا آغاز آپریشن بنیان مرصوص اور بلوچستان کے ضلع خضدار میں دہشت گرد حملے کے شہداء کے ایصال ثواب کے لیے فاتحہ خوانی سے ہوا۔
بھارت خود کو دہشت گردی کا شکار ظاہر کرتا ہے لیکن حقیقت میں وہ دہشت گردی کا مرکزی عنصر اور علاقائی عدم استحکام کا باعث ہے، بھارتی پشت پناہی یافتہ ملک دشمن عناصر کو سختی سے ختم کیا جائے گا۔
شرکاء نے کہا کہ یہ حملہ بھارت کی پشت پناہی سے چلنے والی پراکسی تنظیموں کی طرف سے کیا گیا، جس میں چار معصوم بچے اور دو بے گناہ افراد شہید ہوئے،فورم نے معصوم شہریوں خصوصاً بچوں کو ہدف بنانے کو انسانیت اور بین الاقوامی قوانین کی سنگین خلاف ورزی قرار دیا۔
کانفرنس نے شہداء کو خراج عقیدت پیش کیا جنہوں نے بھارتی بلا اشتعال جارحیت کے دوران اپنی جانوں کا نذرانہ پیش کیا،فورم نے یقین دہانی کرائی کہ شہداء کا خون رائیگاں نہیں جائے گا اور پاکستانی عوام کا تحفظ مسلح افواج کی اولین ترجیح ہے۔
شرکاء نے فیلڈ مارشل سید عاصم منیر کے سٹریٹجک وژن، مضبوط قیادت اور قومی دفاع میں ان کی خدمات کو سراہتے ہوئے انہیں فیلڈ مارشل کا اعزاز ملنے پر مبارکباد دی۔
کانفرنس میں ملک کی داخلی و خارجی سلامتی کے مسائل کا تفصیلی جائزہ لیا گیا اور آپریشن بنیان مرصوص کی کامیابی کو سراہا گیا۔
شرکاء نے پاکستانی مسلح افواج کی مہارت، آپس میں ہم آہنگی، بلند حوصلہ اور قوم کی حمایت کو سراہا، اس کے علاوہ میڈیا کو بھی خراج تحسین پیش کیا جنہوں نے بھارتی پروپیگنڈے اور جعلی خبروں کے خلاف ریاست کا بھرپور ساتھ دیا۔
کانفرنس نے پاکستانی نوجوانوں کی حب الوطنی اور قومی جذبے کو بھی سراہا جنہوں نے قومی بیانیہ کو موثر انداز میں عوام تک پہنچایا۔
شرکاء نے سیاسی قیادت کی دور اندیشی، معرکہ حق کے دوران ان کی قیادت، پختہ یقین اور قوم کی رہنمائی کو سراہتے ہوئے بھارتی جارحیت کے خلاف کامیابی کا سہرا ان کے سر باندھا۔
فورم نے پاکستان کی بروقت اور موثر دفاعی کارروائی کو بہترین حکمت عملی قرار دیا۔
شرکاء نے پاکستان کی خودمختاری اور علاقائی سالمیت کے تحفظ کے لیے ہر قسم کی جارحیت کا بھرپور مقابلہ کرنے کے عزم کا اعادہ کیا۔
کانفرنس نے بھارت کی حمایت یافتہ دہشت گرد پراکسیوں کے خلاف بھرپور کارروائی جاری رکھنے اور ان کے سہولت کاروں کو ختم کرنے پر زور دیا۔
شرکاء نے کہا کہ بھارت کی پراکسیز پاکستان میں عدم استحکام پھیلانے کے لیے سرگرم ہیں لیکن پاکستان کسی بھی طرح اس سازش کو کامیاب نہیں ہونے دے گا۔
فورم نے مسلح افواج، انٹیلی جنس ایجنسیوں اور قانون نافذ کرنے والے اداروں کی ہم آہنگی کو سراہتے ہوئے کہا کہ دہشت گرد عناصر کو مکمل طور پر ختم کیا جائے گا۔
شرکاء نے علاقائی سکیورٹی صورتحال، خاص طور پر مشرقی بارڈر اور مقبوضہ کشمیر میں انسانی حقوق کی سنگین خلاف ورزیوں پر گہری تشویش کا اظہار کیا۔
کانفرنس نے بھارت کی اشتعال انگیز کارروائیوں کی سخت مذمت کی اور خطے میں پائیدار امن کے لیے عالمی برادری کی فوری توجہ اور مداخلت کی ضرورت پر زور دیا۔
شرکاء نے کشمیری عوام کی حق خود ارادیت کی جدوجہد کو بھرپور سفارتی، سیاسی، اخلاقی اور انسانی حمایت کا یقین دلایا۔
آرمی چیف نے تمام رینکس کے حوصلے، اعلیٰ آپریشنل تیاری، پیشہ وارانہ صلاحیتوں اور قوم کی غیر متزلزل حمایت کو سراہا اور حالیہ کامیابیوں کو اللہ تعالیٰ کا فضل قرار دیا۔
آرمی چیف نے فورم کو درپیش سلامتی کے خطرات کے تناظر میں اعلیٰ سطح کی آپریشنل تیاری کی ضرورت پر زور دیا۔
کانفرنس کے اختتام پر آرمی چیف نے ملکی استحکام کو یقینی بنانے اور سرحدوں کے تحفظ میں پاک فوج کے اہم کردار پر اعتماد کا اظہار کیا اور جاری اقدامات کو سراہا۔
