پنجاب کی وزیراعلیٰ مریم نواز فروزن شولڈر کی شکایت پر میو ہسپتال لاہور گئیں، جہاں ان کا ایم آر آئی کیا گیا جو نارمل آیا۔ ان کے ہمراہ سینئر وزیر مریم اورنگزیب بھی موجود تھیں۔
لاہور: وزیراعلیٰ پنجاب مریم نواز طبیعت کی خرابی کے باعث اچانک میو ہسپتال لاہور پہنچ گئیں۔ ذرائع کے مطابق انہیں دائیں کندھے میں شدید درد کی شکایت تھی، جس کے باعث ان کا ایم آر آئی اسکین کیا گیا۔
طبی ماہرین کے مطابق وزیراعلیٰ کو فروزن شولڈر یعنی کندھے کی سختی اور درد کی شکایت لاحق تھی، جس کی تشخیص کے لیے ایم آر آئی ضروری سمجھا گیا۔ رپورٹ نارمل آنے کے بعد انہیں کچھ دیر زیرِ مشاہدہ رکھا گیا اور پھر میو ہسپتال کے سرجیکل ٹاور سے واپس روانہ ہو گئیں۔
ذرائع کے مطابق وزیراعلیٰ پنجاب کے ہمراہ سینئر صوبائی وزیر مریم اورنگزیب بھی موجود تھیں، جنہوں نے میڈیکل چیک اپ کے دوران ان کا ساتھ دیا۔
یاد رہے کہ فروزن شولڈر ایک عام مگر تکلیف دہ عارضہ ہے، جو اکثر ذہنی دباؤ اور طویل بیٹھنے کے باعث پیدا ہوتا ہے۔ عوامی ذمہ داریاں نبھانے والے افراد میں یہ کیفیت عام دیکھی جاتی ہے، اور بروقت تشخیص سے اس کا علاج ممکن ہوتا ہے۔ وزیراعلیٰ مریم نواز کا ہسپتال جانا اس بات کی علامت ہے کہ وہ اپنی صحت کے حوالے سے سنجیدہ اور بروقت اقدامات کرنے والی قیادت ہیں۔
